काठमाण्डौं । नक्कली भुटानी शरणार्थी प्रकरणको जारी थुनछेक बहसमा न्यायाधीशले नै दिक्क मानेका छन् । पूर्वगृहमन्त्री एवं नेपाली काँग्रेसका नेता बालकृष्ण खाँणको बहसको क्रममा अधिवक्ताहरुले बहस नटुंग्याएपछि उनले दिक्क मान्दै अदालत नै बन्धक बनाउन खोजेको बताएका थिए ।
‘म त बिरामी नै हुन लागिसकेँ छोटो गरौँ’, मंगलबार जिल्ला अदालत काठमाडौंका न्यायाधीश प्रेमप्रकाश न्यौपानेले भने । आइतबार र सोमबार प्रतिवादीका तर्फबाट बहस गर्ने अधिवक्ता अन्तिम समयमा इजलासमा नभेटिने समस्या थियो । तर मंगरबार भने अधिवक्ताहरूको एक प्रकारले भन्ने हो भने जुलुश नै देखियो । प्रतिवादी बालकृष्ण खाँणको तर्फबाट बहस गर्न वकिलहरु लाइनमा थिए । साँझ ६ बजिसक्दा पनि खाँणका तर्फबाट बहस गरेका अधिवक्ता मणिराम उपाध्यायले बहस सके ।
पौने ६ बजे न्यायाधीश न्यौपानेले उपाध्यायलाई सचेत गराएका थिए । उपाध्यायको बहस सकिएपछि खाँडको तर्फबाट बहस गर्न पुगे नेपाल बार एसोसिएसनका अध्यक्ष वरिष्ठ अधिवक्ता गोपालकृष्ण घिमिरे । त्यतिबेला न्यायाधीश न्यौपाने थप बहस सुन्ने मुडमा थिएनन् । उनले भने, ‘अनन्तकालको बहस कहिलेसम्म ? मैले नसक्ने भएँ । नाम टिपाउनुस् न अब । बस्नै नसकिने काम गर्नै नसकिने भयो ।
समय निर्धारण हुनुपूर्व १८ जना प्रतिवादीको तर्फबाट प्रति प्रतिवादी ३ जना अधिवक्ताको हिसाब गरेर समय निर्धारण गरिएको स्मरण गराए । उनले खाँणका अधिवक्तालाई बुधबार १२ बजेसम्म बहस सक्ने निर्देशन नै दिएका छन् । खाँणका अधिवक्ताहरूले समय मागिरहेपछि न्यायाधीश न्यौपानेले भने, ‘मैले टार्न सकिन भोलि १२ बजेसम्म तपाईंहरूका तर्फबाट बहस सक्नुस् । ११ बजेबाट शुरु हुने इजलास १२ बजेसम्म बहस नसकिने भन्दै खाँडका अधिवक्ताले बुधबारको टी ब्रेकसम्मको समय मागेका थिए ।
