काठमाडौं– अभिनेत्री केकी अधिकारीको फिल्म ‘बोक्सीको घर’ सुरुवाती तीन दिनमा दर्शकबाट राम्रो साथ पाएको छ । उच्च अकुपेन्सीका साथ यो फिल्म चौथो दिनमा प्रदर्शनरत छ ।
यस फिल्मले तीन दिनमा ३ करोडको व्यापार गरेको वितरक कम्पनी टी-फोल्कस्को दाबी छ । वितरकका अनुसार फिल्मले शुक्रबार र शनिबार दुई करोड ३० लाख ‘ग्रस कलेक्सन’ गरेको थियो ।
त्यस्तै, आइतबार कम्तीमा ६५ करोडको व्यापारको गरेको टी-फोल्कका प्रबन्धक प्रचण्डमान श्रेष्ठले खबरहबलाई जानकारी दिए । उनले भने, ‘आइतबारको काठमाडौंको कलेक्सन आइसकेको छ । उपत्यकाबाहिरको रिपोर्ट आउन केही समय लाग्छ । सबै गरेर कम्तीमा पनि ६५ लाख उठ्ने हाम्रो अनुमान छ ।’
सुलक्षण भारतीको लेखन र निर्देशन रहेको यस फिल्ममा केकी मुख्य भूमिकामा छन् । बालकलाकार सुपला सापकोटाको अभिनयले चर्चा पाएको छ ।
यस फिल्मले बालविवाह र बोक्सी कुप्रथाको कथा पेस गरेको छ । सकारात्मक ‘वर्ड अफ माउथ’ का कारण आगामी दिनमा पनि यस फिल्मले दर्शकबाट राम्रो साथ पाउने देखिन्छ ।
