काठमाण्डौं । प्रधानमन्त्री पुष्पकमल दाहाल प्रचण्ड पत्नी सीता दाहालको पार्थिव शरीर राजकीय सम्मानका साथ अन्त्येष्टि गरिने भएको छ । आज बिहान निधन भएकी दाहालको अन्त्येष्टि राजकीय सम्मानसहित गर्न गृह मन्त्रालयले सिफारिस गरेको हो ।
मन्त्रिपरिषद्को बैठकबाट उक्त निर्णय गर्ने बैठक बस्न नसके पछि पारित गर्ने गरि राजकीय सम्मानसहित अन्त्येष्टि गरिने तयारी गरिएको छ । गृह मन्त्रालय आदेश अनुसार पशुपति विकास कोषले राजकीय अन्त्येष्टिको तयारी थालेको कोषका निर्देशक घनश्याम खतिवडाले जानकारी दिए ।
यसैबीच सरकारले सीताको निधनप्रति शोक व्यक्त गर्दै राजकीय सम्मानका साथ अन्त्येष्टि गर्ने निर्णय गरेको छ । आज बसेको मन्त्रिपरिषदको आकस्मिक बैठकले नेपाल कम्युनिष्ट पार्टी माओवादी केन्द्रकी नेतृ एवं केन्द्रीय सल्लाहकार स्वर्गीय दाहालको निधनप्रति शोक प्रकट गर्दै श्रद्धाञ्जली व्यक्त गरेको हो ।
साथै दाहालको अन्त्येष्टिको समयमा राजकीय सम्मानस्वरुप नेपाली सेनाको दुई सेनामुख, स्कर्टपति सहसेनानीको एक टुकडीद्वारा सलामी दिने व्यवस्था मिलाउने समेत निर्णय गरेको थियो ।
सञ्चार तथा सूचना प्रविधि मन्त्री एवं सरकारकी प्रवक्ता रेखा शर्माले जारी गरेको शोक वक्तव्यमा भनिएको छ, “संवत् २०२८ सालदेखि नेपाली कम्युनिष्ट आन्दोलनमा आवद्ध रही समाज रुपान्तरणका लागि भएका सशस्त्र सङ्घर्षलगायतका आन्दोलनमा महत्वपूर्ण भूमिका निर्वाह गर्नुभएकी स्वर्गीय दाहालको निष्ठा, त्याग र सङ्घर्षमय जीवनका उदाहरणीय पक्षलाई सबैले आत्मसात गर्न सक्नु उहाँप्रतिको सच्चा श्रद्धाञ्जली हुने विश्वास नेपाल सरकारको छ ।
