बुटवल । लुम्बिनी प्रदेशका मुख्यमन्त्री चेतनारायण आचार्यले बाह्य तथा आन्तरिक लगानीकर्तालाई आकर्षित गर्न प्रदेश सरकारले लगानी मैत्री नीति अवलम्बन गरेको बताउनुभएको छ ।
नेपाल उद्योग तथा व्यवसायी महासंघ लुम्बिनी प्रदेशको बुटवलमा प्रथम अधिवेसन उद्घाटन गर्दै मुख्यमन्त्री आचार्यले बाह्य तथा आन्तरिक लगानीकर्तालाई आकर्षित गर्न वातावरण निर्माण गर्ने बताउनुभएको हो ।
'स्थानीय उत्पादनलाई बढाउन चाहन्छौं । यसका लागी उद्यम र उद्यमीको विकास गर्न प्रदेश सरकार नीजि क्षेत्रसंग हातोमालो गर्न तयार छ’उहाँले भन्नुभयो,‘स्थानीय उत्पादनलाई बजारमा पुर्याउने, त्यसबाट नागरिकको जीवनस्तर उठाउनेगरी सरकारले नीति निर्माण गरेको छ । त्यसमा नीजि क्षेत्रसंग सहकार्य गरेर अगाडी बढ्न सरकार तयार छ ।’
मुख्यमन्त्री आचार्यले समृद्ध लुम्बिनी आत्म निर्भर प्रदेशको लक्ष्य पुरा गर्न उद्योगी व्यवसायीको साथ खोज्नुभयो । उद्योगी व्यवसायीहरुले राखेका मागहरु प्रति सरकार संवेदनशिल भएको, उद्योग दर्ता, नविकरण तथा सञ्चालनको क्षेत्रमा एकद्वार प्रणाली लागु गर्ने बारेमा सरकारले पहल लिने जानकारी दिनुभयो ।
साना तथा मझौला उद्योग एवम् उद्यमहरुको विकास गर्ने, उद्योग सञ्चालन गर्न चाहिने दक्ष जनशक्ति उत्पादन गर्न पनि लगानी लगाउने, उद्योग तथा उद्यममैत्री पूर्वाधार निर्माणमा सरकारले ध्यान दिने बताउनुभयो ।
महासंघका अध्यक्ष माधव प्रसाद नेपालको अध्यक्षतामा भएको अधिवेशनले माधव प्रसाद नेपालको अध्यक्षतामा नयाँ कार्यसमिति चयन गरेको छ ।
उपाध्यक्षमा द्वय दधिराम खरेल र भास्कर काफ्ले, सचिवमा केशवराज पन्थी, कोषाध्यक्षमा लक्ष्मी क्षेत्री, सहसचिवमा पुरुषोत्तम अर्याल, सरोज चौधरी, जीवन कक्षपती, सहकोषाध्यक्षमा जुद्ध केसी सहित अन्य सदस्यमा रहनुभएको छ ।
