बुटवल । बुटवल उपमहानगरपालिकामा कार्यरत महिला स्वास्थ्य स्वयंसेविकाहरुले गत आर्थिक वर्षमा नियमित सेवा दिए वापत पाउनुपर्ने यातायात खर्च वापतको रकम नपाएको गुनासो गरेका छन् । यसअघिका निर्वाचित जनप्रतिनिधिले महिला स्वास्थ्य स्वयंसेविकाहरुलाई मासिक १ हजार रुपैयांको दरले यातायात खर्च वापत उपलब्ध गराउन गरेको निर्णय पछिल्लो निर्वाचित जनप्रतिनिधिले कार्यान्वयन नगरेको भन्दै बुधवार उपमहानगरपालिकाको ध्यानाकर्षण गराएका हुन् ।
महिला स्वास्थ्य स्वयंसेविका बुटवल उपमहानगरसमितीका अध्यक्ष रुक्मीणी भट्टराईले आफुहरुको सेवा सुविधाबारे यसअघिका जनप्रतिनिधिले निर्णय गरि २०७८ साल चैत्र २५ गते उपमहानगरपालिकाको राजपत्रमा समेत प्रकाशित भईसकेपनि पछिल्लो एकवर्ष यता यातायात खर्च वापतको रकम पाउन नसकेको गुनासो गरिन ।
भट्टराईका अनुसार बुटवलमा कार्यरत महिला स्वास्थ्य स्वयंसेविकाहरुलाई सेवा अवधीभरी यातायात खर्च वापत मासिक १ हजारका दरले एकवर्षको १२ हजार रुपैयां उपलब्ध गराउने निर्णय गरिएको थियो । त्यस्तै अवकाश भएर जांदा ५ वर्षसम्म काम गरेकोलाई वार्षिक ५ हजार, ५ देखि १० वर्षसम्मको लाई वार्षिक ७ हजार, १० देखि १५ वर्षसम्मको लाई वार्षिक ८ हजार, १५ देखि २० वर्षसम्मको लाई वार्षिक ९ हजार र २० वर्षदेखि माथिकोलाई वार्षिक १० हजारका दरले अवकाश वापतको एकमुष्ट रकम दिने उपमहानगरको कार्यपालिकाले निर्णय गरेको थियो ।
उक्त निर्णयलाई नगर कार्यापालिकाको २०७८ चैत्र २५ गतेको राजपत्रमा समेत प्रकाशित गरिएको थियो । तर उपमहानगरपालिकाले यातायात वापतको रकम समेत नदिएको भट्टराईले बताईन । उपमहानगरपालिकाका प्रमुख खेलराज पाण्डेले यसअघिका जनप्रतिनिधिले आफु जांदाजांदै गरेको निर्णयमाथी थप अध्ययन गरेर मात्रै कार्यान्वयन गरिने बताए । १९ वडा रहेको बुटवल उपमहानगरपालिकाभित्र १७७ जना महिला स्वास्थ्य स्वयंसेविका कार्यरत छन्।
