देउखुरी । लुम्बिनी प्रदेशका सभामुख तुलाराम घर्ती मगरले संघीयता सफल बनाउन सबैले जोड दिनु पर्ने बताएका छन् ।
अहिले पनि केन्द्रीकृत सोचले काम गरेकाले संघीयता कार्यान्वयनमा चुनौती देखिएको बताउनु हुँदै संघीयता सफल बनाउन प्रदेशलाई सफल बनाउनु पर्नेमा जोड़ दिए ।
शुक्रबार प्रदेश राजधानी राप्ती उपत्यका देउखुरीमा लुम्बिनी प्रदेश सभा सचिवालयले आयोजना गरेको पुर्ब सांसद मञ्चसंग कानुन निर्माण तथा संसदीय कामकारबाही सम्बन्धि अनुभव आदानप्रदान कार्यक्रमलाई सम्बोधन गर्दै उनले संघीयतालाई कसरी सफल बनाउने भन्नेमा पुर्ब संसदले पनि चासो र सरोकार लिन आवश्यक रहेको बताएका छन् ।
मञ्चका अध्यक्ष डा.कृष्ण प्रसाद न्यौपानेको अध्यक्षता र सभामुख तुलाराम घर्ती मगरको प्रमुख आतिथ्यता लुम्बिनी प्रदेशका मन्त्रीहरु, उप सभामुख मेनुका खाड केसी, प्रदेश सभा विषयगत समितीका सभापतिहरुको आतिथ्यता तथा प्रदेश सभाका सदस्यहरु प्रदेश सभाका पुर्ब सदस्यहरुको सहभागीता रहेको उक्त कार्यक्रममा पुर्ब कानुन सचिव राजेन्द्र थापाले प्रदेश कानुन निर्माणमा प्रदेश सभा सदस्यको भुमिका अभ्यास, अवसर, चुनौती र सम्भावना विषयमा कार्यपत्र प्रस्तुत गरेका थिए ।
उनले कानुन निर्माणमा दलिय व्हिप लगाउदा कानुन कार्यान्वयनमा चुनौती थपिएको बताए । त्यसैगरी अधिबक्ता महेन्द्र पाण्डेले संघीयता कार्यान्वयनम देखिएका चुनौतीहरु बिषयमा कार्यपत्र प्रस्तुत गरेका थिए ।
संघीयता बारेमा ओठे प्रतिबद्धताले संघीयता पुर्ण रुपमा कार्यान्वयन हुन नसकेको उनको भनाई छ । संघीयता कार्यान्वयनमा कर्मचारी र दलका नेताले इमानदारता र रुचि नदिएको पाइएको उनले बताए ।
टिप्पणीकर्ता नेका प्रदेश सभा पुर्ब सचेतक निर्मला क्षेत्री,दामा शर्मा, पुर्ब स्वास्थ्य मन्त्री एवं प्रदेश सभा सदस्य बिष्णु पन्थी,लगायतले संघीयता कार्यान्वयनको लागि प्रदेशले बनाएको कानुनहरुलाई प्रभावकारी रुपमा कार्यान्वयन गर्न जरुरी रहेको बताएका थिए ।
कार्यक्रम मञ्चका उपाध्यक्ष रमा अर्यालको स्वागत र महासचिब गिता थापाको संचालन सम्पन्न भएको थियो ।
