गुल्मी । छत्रकोट गाउँपालिकाले आगामी आर्थिक वर्ष २०८२/८३ का लागि “स्वास्थ्य, शिक्षा, कृषि र पूर्वाधार, सुशासनसहितको समृद्ध हाम्रो आधार” भन्ने नारालाई आत्मसात गर्दै बहुआयामिक नीति तथा कार्यक्रम सार्वजनिक गरेको छ। मंगलबार बसेको गाउँकार्यपालिका बैठकमा अध्यक्ष रामप्रसाद पाण्डेले प्रस्तुत गरेको योजनाले उच्च शैक्षिक उपलब्धि र डिजिटल शिक्षालाई प्रोत्साहन गर्दै, एसईईमा GPA ४.० प्राप्त गर्ने विद्यार्थीलाई रु १५१,०००, GPA ३.९९–३.९० लाई रु ५१,००० र GPA ३.८९–३.८० ल्याउनेलाई रु २५,००० पुरस्कार दिने घोषणा गरिएको छ । कार्यक्रममा “पुरानो शिक्षापद्धतिबाट डिजिटल शिक्षातर्फ” संक्रमण गर्दै कक्षा ८–१० लाई पूर्ण डिजिटल शिक्षण प्रणालीमा रूपान्तरण गर्ने निर्णय समेत गरिएको छ ।

यस नीतिमा सामाजिक सुरक्षालाई पनि मुख्य प्राथमिकतामा राख्दै “स्थानीय सरकार सारथी” कार्यक्रममार्फत ५० वर्ष माथिका एकल महिला तथा पुरुषलाई जीवन निर्वाह भत्ता प्रदान गरिने, प्रत्येक वडामा जेष्ठ नागरिक दिवा सेवा केन्द्र स्थापना गरिने र स्वयंसेवकमार्फत् वृद्धहरूको हेरचाह गर्ने प्रतिबद्धता पनि समावेश गरिएको छ । पूर्वाधार क्षेत्रमा कालोपत्रे सडक निर्माण, पहिरो रोकथाम तथा “हरित सडक” अवधारणा अन्तर्गत अम्रिसोल जस्ता आयआर्जनमुखी बिरुवा रोप्ने योजना अघि सारिएको छ, जसमा वातावरणीय संरक्षण र स्मार्ट पूर्वाधार निर्माणलाई प्राथमिकता दिइएको छ ।

योजनामा सामाजिक समावेशीतालाई बलियो बनाउन भूमिहीन दलित, सुकुम्बासी र अव्यवस्थित बसोबास गर्ने परिवारलाई जग्गा उपलब्ध गराउने, जुवा–तास तथा लागू पदार्थ र मदिरा सेवनले पारिवारिक विघटन ल्याउने प्रवृत्तिबाट प्रभावित व्यक्तिलाई मनोपरामर्शमार्फत पुनर्संरचना गर्ने, कर सचेतना अभियान सञ्चालन गर्ने र विपद्का बेला उद्धार स्वयंसेवकलाई सम्मान गर्ने प्रावधानहरू समावेश गरिएको छ । यस्तै, जिल्ला भित्रका नदीजन्य पदार्थ (ढुङ्गा, गिट्टी, बालुवा, रोडा) सम्बन्धी रोयल्टी तिर्ने र रसिद नलिने अवस्थामा जरिवाना गर्ने व्यवस्था पनि तय गरिएको छ ।

स्वास्थ्यसेवा सुधार तर्फ, विदेश वा अन्य स्थानबाट आउने आफन्तलाई शव व्यवस्थापन सहज हुन प्राथमिक स्वास्थ्य केन्द्रमा शवगृह फ्रिजलगायत पूर्वाधार लगाउने योजना सहित, कृषि तथा पशुपालन उद्यमीहरूलाई जग्गा भाडामा दिई सहुलियतपूर्ण अनुदान वितरण गर्ने तरकारी तथा उत्पादन आधारित उद्यमहरूलाई समावेश गरिएको छ । प्रस्तुत सबै योजनाहरुले शिक्षा, स्वास्थ्य, पूर्वाधार, वातावरण, सामाजिक न्याय एवं आर्थिक समावेशीतालाई एकीकृत गर्दै “समृद्ध हाम्रो आधार” नारालाई व्यवहारमा परिणत गर्ने उल्लेखनीय प्रतिबद्धता दर्शाउँछन्।