काठमाडौं । नेपाल भ्रमणमा रहनुभएका चिनियाँ कम्युनिष्ट पार्टीका नेता युआन च्याचिनले नेपालको बिकासको सन्दर्भमा सहयोग गर्न सदैव तयार रहेको बताउनुभएको छ । मंगलबार एमाले मुख्यालय च्यासलमा नेकपा एमालेका अध्यक्ष केपी शर्मा ओलीसंग भेटवार्ता गर्दै युआन च्याचिनले नेपालको बिकासमा चीन सदैव सकारात्मक रहेको र आवश्यक सहयोग गर्न तयार रहेको बताउनुभएको हो ।
भेटका क्रममा एमाले अध्यक्ष ओलीले पनि नेपाल बिकासको प्रयासमा रहेकाले चीन सरकार र चिनियाँ जनताको सहयोग महत्वपूर्ण रहेको बताउनुभएको थियो । त्यस्तै चिनियाँ नेता युआन च्याचिनले नेपाल भ्रमणका क्रममा भएको भेटवार्ताका बारेमा पनि जानकारी गराउनुभएको थियो भने ओलीले दुई पक्षिय सम्बन्धका बारेमा चर्चा गर्नुभएको एमाले विदेश विभाग सदस्य गोपाल खनालले जानकारी दिनुभयो ।
नेकपा माओवादी केन्द्रको निमन्त्रणमा चिनियाँ कम्युनिष्ट पार्टीका नेता युआन साउन ७ गते काठमाडौं आउनुभएको थियो ।
