बुटवल। लुम्बिनी प्रदेश सभाको हिउँदे (सातौँ) अधिवेशन मंसिर ८ गते सोमबारका लागि बोलाउने निर्णय भएको छ ।
मुख्यमन्त्री चेतनारायण आचार्यको अध्यक्षतामा सोमबार बसेको प्रदेश मन्त्रिपरिषद् बैठकले अधिवेशन आह्वान गर्न प्रदेश प्रमुखसमक्ष सिफारिस गर्ने निर्णय गरेको सरकारका प्रवक्ता तथा कृषि, भूमि व्यवस्था तथा सहकारी मन्त्री दिनेश पन्थीले जानकारी दिए ।
प्रवक्ता पन्थीका अनुसार संवैधानिक व्यवस्थाअनुसार सरकारले प्रदेश प्रमुखलाई हिउँदे अधिवेशन आह्वान गर्न सिफारिस गर्ने निर्णय गरेको हो। यसअघि गत भदौ ३१ गते वर्षे अधिवेशन अन्त्य भएको थियो ।
आगामी हिउँदे अधिवेशनमा स्थानीय तहका कर्मचारीहरूको सेवा–सुविधा संशोधनसम्बन्धी विधेयक र लुम्बिनी अध्ययन, अनुसन्धान तथा प्रशिक्षण प्रतिष्ठान विधेयक दर्ता भइसकेका छन् ।
साथै, दलित अधिकार सम्बन्धी विधेयक र बडघरसम्बन्धी विधेयक पनि दर्ता गर्ने तयारी भइरहेको छ । त्यसैगरी विभिन्न समितिका प्रतिवेदन र महालेखा परीक्षकको प्रतिवेदन पनि यस अधिवेशनमा छलफलका लागि प्रस्तुत हुने प्रदेशसभा सचिवालयले जनाएको छ ।
