धनुषा – त्रेता युगमा भएको राम/सीताको विवाहको सम्झनामा धनुषाको जनकपुरधाममा मनाउने गरिएको विवाह पञ्चमी महोत्सव आज समापन हुँदैछ ।
विवाह पञ्चमीको मुख्य दिन हिजो स्वयंम्बर र विवाह सम्पन्न भएको छ । जानकी मन्दिरबाट माता सीताको डोला र राम मन्दिरबाट भगवान रामको डोला निकालेर ऐतिहासिक रंगभूमि मैदानमा परम्परागत विधिअनुसार परिक्रमा गराई स्वयंम्बर गरियो ।
स्वयंवर कार्यक्रम सकिएपछि हिजो बेलुका जानकी मन्दिरमा वैदिक परम्पराअनुसार वैवाहिक कार्यक्रम गरिएको जानकी मन्दिरका महन्थ राम तपेश्वर दासले जानकारी दिनुभयो ।
विवाह पञ्चमीको सप्ताहव्यापी कार्यक्रम अन्तर्गत भारतबाट आएका पाहुनालाई आज बिदा गरेपछि विवाह पञ्चमी महोत्सव सकिनेछ । भारतबाट आएका पाहुनालाई बिदा गरिने कार्यलाई रामकलेवा भनिन्छ ।
