काठमाडौं । नेकपा एमालेका सचिव योगेश भट्टराईले संसदीय समितिको पूर्णता नभए सम्म बैठकमा सहभागी नहुने बताउनुभएको छ । संघीय संसद् प्रतिनिधिसभा अन्तर्गतको सार्वजनिक लेखा समितिको बैठकमा बोल्दै एमाले सचिव भट्टराईले संसदीय समितिले पूर्णता नपाएसम्म एमाले समितिका कुनै पनि बैठकमा सहभागी नहुने स्पष्ट पार्नुभएको हो ।
उहाँले संसदीय प्रक्रियाअनुसार संसद् र समितिहरु चल्न नसकेको भन्दै गठबन्धनका कारण समितिहरुले पूर्णता पाउन नसकेको दाबी गर्नुभयो । सचिव भट्टराईले “सत्तारुढ गठबन्धनका कारण सिर्जना भएको समस्याको भारी प्रतिपक्षले नसक्ने भन्दै संसद् प्रभावकारीरुपमा चल्न नसक्दा मुलुकको राष्ट्रिय एकताको प्रतीक संसद् र संविधान बन्न नसकेको जिकिर गर्नुभयो । “प्रतिपक्षी दल एमालेले कुनै भागबन्डा नमागेको स्पष्ट पार्नुभयो ।
लेखा समितिको सभापति प्रतिपक्षले पाउनुपर्ने अभ्यास छ । गठबन्धनले यो पनि दिन चाहँदैन भने हामीलाई चाहिँदैन । तर संसदीय प्रक्रिया पूरा गरेर अघि बढ्नुपर्छ”, उहाँले भन्नुभयो । समितिले काम सुरु गरेको तीन महिनासम्म पनि सभापति चयन हुन नसक्नु राम्रो नभएको उहाँको भनाइ छ ।
