अर्घाखाँची । सन्धिखर्क नगरपालिका वडा नम्बर ७ फज्याङखोलामा निर्माण सम्पन्न भएको नयाँ वडा कार्यालय भवनको उद्घाटन गरिएको छ ।
भवनको उद्घाटन सन्धिखर्क नगरपालिकाका नगर प्रमुख कृष्णप्रसाद श्रेष्ठले गरेका हुन् । उद्घाटन समारोहलाई सम्बोधन गर्दै नगर प्रमुख श्रेष्ठले वडा कार्यालयलाई पूर्वाधार र प्रविधिमैत्री बनाउने उद्देश्यले नगरपालिकाले निरन्तर प्रयास गरिरहेको बताए ।
उनले अब आफ्नै भवनबाट सेवा सञ्चालन भएपछि वडा नम्बर ७ का बासिन्दाले अझ प्रभावकारी र सहज सेवा पाउने विश्वास व्यक्त गरे । साथै नगरपालिकाले शिक्षा, स्वास्थ्य, सामाजिक क्षेत्र तथा भौतिक पूर्वाधार विकासलाई प्राथमिकतामा राखेर काम गरिरहेको पनि उनले बताए ।
कार्यक्रममा नगर उपप्रमुख मिश्रा आचार्य, प्रमुख प्रशासकीय अधिकृत प्रमोद खनाल तथा नेपाल पत्रकार महासंघ अर्घाखाँचीका अध्यक्ष गणेश खनालले मन्तव्य राख्दै स्थानीय सरकार जनताको सरकार भएकाले सेवा प्रवाहलाई सुशासनमैत्री र प्रशासनमैत्री बनाउनु आवश्यक रहेको बताएका थिए ।
उक्त कार्यक्रममा वडा कार्यालय भवन निर्माणका लागि जग्गा उपलब्ध गराउने सीता केसी, वसन्त मल्ल र धनबहादुर केसीलाई सम्मान गरिएको थियो । साथै निर्धारित समयभन्दा अगावै निर्माण कार्य सम्पन्न गर्ने निर्माण व्यवसायी नारायण आचार्य र अर्जुन खनाललाई पनि सम्मान गरिएको थियो ।
सन्धिखर्क नगरपालिका वडा नम्बर ५, ६, ७, ८ र १२ का वडा कार्यालय भवन निर्माणको जिम्मा नयाँ नेपाल निर्माण कम्पनीले करिब ७ करोड ४५ लाख रुपैयाँमा लिएको थियो । कार्यक्रममा वडामा क्रियाशील विभिन्न राजनीतिक दलका प्रतिनिधि, बुद्धिजीवी, शिक्षाप्रेमी तथा सरोकारवालाको उल्लेख्य उपस्थिति रहेको थियो ।
वडा नम्बर ७ का अध्यक्ष चुरा बहादुर केसीको अध्यक्षतामा सम्पन्न कार्यक्रमको सञ्चालन वडा सचिव सीता बिसी पराजुलीले गरेकी थिइन् भने स्वागत मन्तव्य वडा सदस्य मीना ज्ञवालीले व्यक्त गरेकी थिइन् ।
कार्यक्रममा योजना शाखा प्रमुख दिल बहादुर केसी, सब–इन्जिनियर नारायण पोखरेललगायतको पनि सहभागिता रहेको थियो ।
