काठमाडौं । संसदको दोस्रो ठूलो दल नेपाली कांग्रेसले प्रतिनिधि सभाको समानुपातिकतर्फका २० सांसदको सूची टुंगो लगाएको छ।
आइतबार बसेको पार्टीको केन्द्रीय कार्यसम्पादन समितिको बैठकले १५ महिला र ५ पुरुषसहित २० जनाको नाम अन्तिम रूपमा तय गरेको हो। पार्टी प्रवक्ता तथा केन्द्रीय समिति सदस्य देवराज चालिसेले कांग्रेसले प्राप्त गरेको २० सिटका आधारमा समानुपातिक बन्दसूचीबाट प्रतिनिधि सभा सदस्य छनोट गरी निर्वाचन आयोगमा पठाउने निर्णय गरिएको जानकारी दिए।
उनका अनुसार संवैधानिक व्यवस्था अनुसार कम्तीमा १५ महिला हुनुपर्ने भएकाले सोही आधारमा सूची तयार गरिएको हो। निर्वाचन आयोगले क्लस्टरअनुसार रूजु गरेपछि आवश्यक परे सामान्य फेरबदल हुन सक्ने भए पनि हालका लागि २० जनाको सूची टुंगो लगाइएको कांग्रेसले जनाएको छ।
यससँगै प्रतिनिधिसभा र राष्ट्रियसभा गरी कांग्रेसका कुल सांसद संख्या ६२ पुग्ने भएको छ। समानुपातिक सूचीमा विभिन्न समुदायको प्रतिनिधित्व सुनिश्चित गरिएको छ।
खसआर्य र आदिवासी जनजाति समूहबाट ६–६ जना, मधेसी र दलित समुदायबाट ३–३ जना तथा थारू र मुस्लिम समुदायबाट १–१ जनालाई समेटिएको छ।
कांग्रेसका २० समानुपातिक सांसद (प्रस्तावित सूची) खसआर्य कोटाबाट:
१. सुशीला ढकाल २. रुक्मिणीदेवी कोइराला ३. रीना उप्रेती ४. सीता थपलिया ५. गंगा शाही ६. अर्जुननरसिंह केसी
आदिवासी जनजाति कोटाबाट:
७. गीताकुमारी सेन्दाङ ८. गंगालक्ष्मी अवाल ९. गीता गुरुङ १०. रेनुका काउचा ११. सुनिताकुमारी सुवेदी १२. भीष्मराज आङ्देम्बे
मधेसी कोटाबाट: १३. निनुकुमारी कर्ण १४. रेखाकुमारी यादव १५. चन्द्रमोहन यादव
दलित कोटाबाट: १६. हरिनादेवी कामी १७. पवित्रा विक १८. मानबहादुर नेपाली
थारू कोटाबाट: १९. प्रमिलाकुमारी गच्छदार
मुस्लिम कोटाबाट: २०. शाहजान खातुन
राजनीतिक विश्लेषकहरूका अनुसार कांग्रेसले समानुपातिक सूचीमार्फत महिला प्रतिनिधित्व, क्षेत्रीय सन्तुलन र विभिन्न समुदायको समावेशी सहभागिता कायम गर्ने प्रयास गरेको देखिन्छ।
