काठमाडौँ। प्रधानमन्त्री पुष्पकमल दाहाल ‘प्रचण्ड’ले फोटो खिच्नेबेला विचार पुर्‍याउन आफ्ना नेता तथा पदाधिकारीहरुलाई सुझाव दिनुभएको छ। सुन काण्डका अभियुक्तसँग माओवादी नेता बर्षामान पुन र उहाँकी पत्नी ओनसरी घर्तीले खिचेको तस्बिर यतिवेला सामाजिक सञ्जालमा भाइरल भइरहेका बेला प्रधानमन्त्री प्रचण्डले फोटो खिच्दा जो कोहीसँग जुनसुकैबेला नखिच्न नेताहरुलाई सुझाव दिनुभएको हो।

प्रधानमन्त्री निवास बालुवाटारमा सोमबार बिहान बसेको माओवादी पदाधिकारी बैठकमा प्रधानमन्त्री दाहालले अभियुक्तसँग देखिएको नेताहरुको तस्बिरलाई अनुसन्धान नै प्रभावित हुने गरी प्रचार गरिएको बताउनु भएको छ।

नेता पुनले आफ्नोबारे चरित्रहत्या गरिएको उल्लेख गर्दै छानबिन समिति बनाउन माग गर्नुृभएको छ। प्रधानमन्त्री दाहालले पदाधिकारीहरुलाई सचेत गराउँदै भेटौं, फोटो खिचौं भन्ने मान्छेहरूलाई नाइँ भन्न नि कठिन नै हुन्छ तर पनि विचार पुर्‍याउनुहोला।’ उहाँले सुन प्रकरणका दोषीलाई उम्कन नदिने पनि जिकिर गर्नुभयो।