काठमाडौं– नेपाली कांग्रेसका नेता भीष्मराज आङ्देम्बेले जेन-जी मुद्दाबाट उठेका परिवर्तनलाई आत्मसात गर्न पार्टी तयार रहेको बताएका छन्।
प्रतिनिधिसभाको पहिलो बैठकमा बोल्दै उनले कांग्रेसले हरेक कालखण्डमा परिवर्तनको नेतृत्व गर्दै आएको स्मरण गराउँदै, जेन-जी विद्रोहले उठाएको मुद्दालाई निष्कर्षमा पुर्याउन पार्टी प्रतिबद्ध रहेको बताए।
आङ्देम्बेले भने, ‘भदौ २३ र २४ गते सिंहदरबारमा भएका घटनाको अध्ययन गर्न जरुरी छ। कसैले २३ को घटना देख्छन्, कसैले २४ को घटना नदेख्ने भएको छ। यो प्रविधि एकदम गलत छ।’
उनले जाँचबुझ आयोगले पनि केवल २३ गतेको घटनामात्र अध्ययन गरेको र २४ गतेको घटना किन समावेश नभएको भन्ने प्रश्न उठाएका छन्। साथै, आयोगको प्रतिवेदन सरकारले स्वयं सार्वजनिक गर्ने कि जनता गोरखापत्र पढेर बुझ्ने भन्ने स्पष्ट नभएकोमा चिन्ता व्यक्त गरे।
‘जाँचबुझ आयोगको प्रतिवेदन स्वयं सरकारले सार्वजनिक गर्ने कि सरकारले पनि गोरखापत्र पढ्ने? ‘ भन्दै प्रश्न समेत गरेका छन्।
आङ्देम्बेले ‘एक जिम्मेवार राजनीतिक दलको रुपमा कांग्रेस परिवर्तनलाई समर्थन गर्न र खबरदारी गर्न प्रतिबद्ध छ,’ भने।
