बुटवल । नेपाल उद्योग वाणिज्य महासंघ (एफएनसीसीआई) लुम्बिनी प्रदेश अध्यक्ष पदका लागि जमशेर मिया र ठाकुरकुमार श्रेष्ठ चुनावी मैदानमा उत्रिएका छन् ।
चैत २१ गते हुने अधिवेशनमा अध्यक्ष पदका लागि हुने प्रतिस्पर्धाले व्यवसायिक वृत्तमा चासो बढाएको छ । चन्दौटा उद्योग वाणिज्य संघका पूर्वअध्यक्ष तथा महासंघका कार्यकारिणी सदस्य समेत रहेका जमशेर मियालाई प्रदेशका विभिन्न जिल्लाबाट उल्लेखनीय समर्थन प्राप्त भइरहेको बताइएको छ ।
व्यवसायीहरूबीच मियाले समावेशी नेतृत्व, क्षेत्रीय सन्तुलन र उद्यमीको हितमा काम गर्ने प्रतिबद्धताका कारण लोकप्रियता हासिल गरेका छन् । निर्वाचन आयुक्त वरिष्ठ अधिवक्ता धर्म खड्काका अनुसार अध्यक्ष पदबाहेक अन्य अधिकांश पदहरूमा निर्विरोध चयन भएको छ । जिल्ला नगर उपाध्यक्षमा दाङका टंकसिंह बुढाथोकी, एसोसिएट उपाध्यक्षमा पाल्पाका राजु महर्जन र कोषाध्यक्षमा बर्दघाटका लेखनाथ न्यौपाने निर्विरोध भएका छन् ।
त्यसैगरी खुला सदस्यतर्फ ओमप्रकाश अग्रहरी (परासी), माधव भण्डारी (प्युठान) र बद्रिनाथ बराल (बर्दिया) उम्मेदवार रहेका छन् । एसोसिएट सदस्यमा सौरभ अग्रवाल र युवराज पोखरेल तथा वस्तुगत सदस्यमा कृष्णप्रसाद घिमिरेको उम्मेदवारी परेको छ । भैरहवास्थित प्रदेश सचिवालयमा आयोजना हुने प्रदेश सभा बिहान ९:३० बजे सुरु हुने छ ।
उद्घाटनपछि बन्दसत्रमा अध्यक्षको सम्बोधन, गणपूरक संख्या, वार्षिक प्रतिवेदन प्रस्तुत र आगामी आर्थिक वर्षका लागि लेखा परीक्षक नियुक्ति लगायतका एजेन्डा समावेश गरिएका छन् ।
आगामी नेतृत्व चयनले लुम्बिनी प्रदेशको औद्योगिक तथा व्यावसायिक विकासमा महत्वपूर्ण दिशा निर्धारण गर्ने अपेक्षा गरिएको छ । यसैबीच, जमशेर मियालाई प्राप्त समर्थनले चुनावी प्रतिस्पर्धा थप रोचक बनेको छ ।
