काठमाडौँ । स्वास्थ्य बिमा बोर्डले आकस्मिक उपचार सेवाको दुरुपयोग रोक्न नयाँ कडाइ लागू गर्दै सामान्य प्रकृतिका बिरामीलाई आकस्मिक उपचारको श्रेणीमा राखेर गरिएको उपचारको खर्च भुक्तानी नगर्ने स्पष्ट गरेको छ। बोर्डले सोमबार निजी स्वास्थ्य सेवा प्रदायक संस्थाहरूलाई पत्राचार गर्दै वास्तविक आकस्मिक अवस्थाबाहेकका उपचारलाई आकस्मिक सेवा देखाएर दाबी पेस गरिए त्यस्ता दाबी स्वीकार नगरिने जनाएको हो।
बोर्डका अनुसार पछिल्लो समय सामान्य प्रकृतिका बिरामीलाई समेत आकस्मिक कक्षमार्फत उपचार गरी स्वास्थ्य बिमाअन्तर्गत भुक्तानी माग्ने प्रवृत्ति बढेको पाइएकाले यस्तो निर्णय लिनुपरेको हो। बोर्डले सेवा प्रदायक संस्था तथा स्वास्थ्यकर्मीहरूलाई बिमा कार्यक्रमको मापदण्ड र निर्देशिका कडाइका साथ पालना गर्न निर्देशन दिएको छ।
यससँगै बोर्डले सेवाग्राहीहरूलाई पनि तोकिएको प्रक्रिया अनुसार सेवा लिन आग्रह गर्दै स्वास्थ्य संस्था वा स्वास्थ्यकर्मीमाथि अनावश्यक दबाब सिर्जना नगर्न अनुरोध गरेको छ। वास्तविक रूपमा आकस्मिक उपचार आवश्यक पर्ने बिरामीको हकमा भने उपचार खर्च यथावत् रूपमा भुक्तानी गरिने बोर्डले स्पष्ट पारेको छ।
बोर्डले जारी गरेको पत्रमा आकस्मिक अवस्थाका बिरामीलाई उपचारका क्रममा भर्ना गर्नुपर्ने वा शल्यक्रिया आवश्यक परेमा उपचार पद्धति अनुसार सम्पूर्ण सेवा प्रदान गरी डिस्चार्ज गर्न सकिने उल्लेख गरिएको छ। स्वास्थ्य बिमा प्रणालीलाई थप प्रभावकारी, पारदर्शी र दुरुपयोगमुक्त बनाउने उद्देश्यसहित बोर्डले यस्तो व्यवस्था लागू गरेको जनाएको छ।
