काठमाडौं । नेपाली कांग्रेसका सभापति गगनकुमार थापाले पार्टीको १५औँ महाधिवेशन तोकिएको मितिमा नै सम्पन्न हुने स्पष्ट पारेका छन्। उनले अदालतको फैसला, नेपालको संविधान र पार्टी विधानका कारण महाधिवेशन अब एक घण्टा पनि तलमाथि नहुने दाबी गरेका हुन्।
गिरिजाप्रसाद कोइराला फाउन्डेसनद्वारा आयोजित कार्यक्रममा सम्बोधन गर्दै सभापति थापाले महाधिवेशन प्रक्रिया कुनै पनि बहानामा नरोकिने भन्दै नेता–कार्यकर्तालाई ढुक्क भएर लोकतान्त्रिक अभ्यासमा सहभागी हुन आह्वान गरे। उनले महाधिवेशनमा सहभागी हुन कसैलाई पनि बन्देज नगरिएको उल्लेख गर्दै पार्टीभित्र अलमलमा रहेका सबै पक्षलाई समेत समेटेर अघि बढ्ने प्रयास निरन्तर जारी रहने बताए।
विधि र थितिमा सम्झौता हुँदैन
सभापति थापाले पार्टीभित्रका विकृति र विसङ्गतिविरुद्ध आफू निर्मम बन्ने तर आन्तरिक एकता र सहकार्यका विषयमा भने नरम र लचिलो हुने नीति लिएको बताए। यस्तो राजनीतिक संस्कार आफूले स्वर्गीय नेता गिरिजाप्रसाद कोइरालाबाट सिकेको उनको भनाइ थियो। “पार्टीभित्रका विकृति र विसङ्गतिविरुद्ध निर्मम बन्ने, तर पार्टीको आन्तरिक एकताका लागि नरम र लचिलो हुने संस्कार मैले गिरिजाबाबुबाट सिकेको हुँ,” थापाले भने।
कांग्रेसलाई विधि, विधान र संस्थागत प्रक्रियाअनुसार सञ्चालन गर्न कुनै सम्झौता नगर्ने उनले दोहोर्याए। थापाले १५औँ महाधिवेशन सम्पन्न भएलगत्तै कांग्रेसले जनतासँग प्रत्यक्ष जोडिने बृहत् अभियान सञ्चालन गर्ने तयारीसमेत सुनाए। महाधिवेशनपछि पार्टी देशका गाउँ–गाउँमा पुगेर जनताका समस्या, अपेक्षा र सुझावसँग जोडिने उनको भनाइ थियो।
गिरिजाप्रसादको आर्थिक नीतिको प्रशंसा
कार्यक्रममा सभापति थापाले पूर्वप्रधानमन्त्री गिरिजाप्रसाद कोइरालाको नेपालको आधुनिक अर्थतन्त्र र निजी क्षेत्रको विकासमा रहेको योगदान ऐतिहासिक र निर्णायक भएको बताए।
नेपालमा निजी क्षेत्रलाई उद्योग, व्यापार तथा ठूला व्यवसाय सञ्चालन गर्न खुला वातावरण सिर्जना गर्ने आर्थिक नीतिको जग कोइरालाले बसालेको उनको भनाइ थियो। त्यसकै परिणामस्वरूप आज नेपालमा ठूलो संख्यामा उद्योगी–व्यवसायी जन्मिन सक्ने वातावरण बनेको उनले बताए।
सबै उद्योग तथा व्यापार सरकारले नै सञ्चालन गर्नुपर्छ भन्ने पुरानो सोचले राज्यलाई आर्थिक बोझमा पार्नुका साथै निजी क्षेत्रको सम्भावनालाई समेत सीमित बनाउने थापाको टिप्पणी थियो।
उनले खुला बजार अर्थतन्त्र, लोकतन्त्रको सुदृढीकरण र समावेशी समृद्धिका लागि गिरिजाप्रसाद कोइरालाले अघि सारेको आर्थिक तथा राजनीतिक दृष्टिकोण आज पनि सान्दर्भिक रहेको बताए।
फाउन्डेसनको नेतृत्व सुनिल शर्मालाई
सोही कार्यक्रममा गिरिजाप्रसाद कोइराला फाउन्डेसनको नेतृत्व नेतृ सुजाता कोइरालाले नेता डा. सुनिल शर्मालाई हस्तान्तरण गरेकी छन्। कार्यक्रममा कांग्रेसका नेता तथा कार्यकर्तासहित विभिन्न क्षेत्रका व्यक्तिहरूको सहभागिता रहेको थियो।
