काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछानले तीनदलले संसदलाई बन्धन बनाएको आरोप लगाउनुभएको छ । मंगलबार प्रतिनिधिसभा बैठकमा बोल्दै लामिछानेले तीनदलबीच कुरा मिल्दा एक हुने र कुरा नमिल्दा सदन नै अवरोध गर्ने देखिएको र संसदलाई नै बन्धन बनाउने काम भएको बताउनुभएको हो ।
उहाँले सदनको समय तोकिएको समयमा नै सुरु गर्ने अवस्था सिर्जना गर्न सभामुखको ध्यानाकर्षण गराउदै विवादका बिषय सभामुख र तीन नेता बसेर समय भन्दा बढि नै मिलाउन सुझाव दिनुभयो । त्यस्तै लामिछानेले सुन प्रकरणमा अनुसन्धान गर्दा राज्यको निकायमा बसेका व्यक्तिहरुमाथि पनि छानविन गर्छ भन्ने प्रतिवद्धता गृहमन्त्रीले जनाउनुपर्ने धारणा राख्नुभयो ।
उच्चस्तरीय छानविन समिति गठनको आवश्यकता छ की छैन भन्नका लागि पनि सदन चल्नुपर्ने उहाँले उल्लेख गर्नुभयो । लामिछानेले ललिता निवास प्रकरणमा सर्वोच्च अदालतले अनुसन्धान गर्न भनिएका पूर्व प्रधानमन्त्री माधव नेपाललाई विदेश भ्रमणमा जान छूट दिएकोमा आपत्ति जनाउनुभयो । जहाजको सीटमा बसेका नेपाल सरकारका सचिवलाई पक्राउ गर्ने तर अदालतले अनुसन्धान गर्नु भनेको भोलिपल्ट पूर्वप्रधानमन्त्रीलाई विदेश भ्रमणमा जान छुट न्याय संगत नभएको उहाँको भनाइ छ ।
त्यस्तै राष्ट्रिय प्रजातन्त्र पार्टीका अध्यक्ष राजेन्द्र लिङ्देनले तीन दल मिलेर संसदीय समितिको भागबण्डा गर्नु संसदीय नियमावली बिपरित भएको बताउनुभयो । सरकारले गरेको अनुसन्धान पूर्ण नभएको भन्दै उहाँले सुन प्रकरणमा उच्चस्तरीय समिति बनाउन तयार हुनुपर्ने जिकिर गर्नुभयो । नक्कली भुटानी शरणार्थी प्रकरणको अनुसन्धान अपूर्ण रहेको र ललिता निवास जग्गा प्रकरणमा कोहि मान्छे जोगाउने प्रयत्न भएको उहाले बताउनुभयो ।
उहाँले सरकारका निकायले मात्रै गर्ने अनुस्न्धानले सुन प्रकरणको अनुसन्धान निष्कर्षमा पुग्न नसक्ने ठोकुवा गर्नुभयो ।
