काठमाडौँँ । सर्वोच्च अदालतले कोशी प्रदेशमा प्रदेशको सबैभन्दा ठूलो दलका संसदीय नेतालाई ४८ घण्टाभित्र मुख्यमन्त्री नियुक्त गर्न परमादेश दिएको छ ।
बिहीबार सर्वोच्च अदालतको पूर्ण इजलासले मुख्यमन्त्री थापा नेतृत्वको सरकारलाई अवैधानिक ठहर गर्दै संविधानको धारा १६८ को ३ अनुसार सरकार गठन प्रक्रिया अघि बढाउन परमादेश दिएको हो । अदालतको परमादेशसंगै अहिलेका मुख्यमन्त्री उद्धव थापा पदमुक्त हुनुभएको छ ।
उद्धव थापाले लिएको विश्वासको मत संविधान विपरीत रहेको ठहर रहेको सर्वोच्चका प्रवक्ता बिमल पौडेलले जानकारी दिनुभयो । विश्वसको मत लिदा सभाको अध्यक्षता गरेका इस्राइल मन्सुरीले मत बराबर नभएको बेला दिएको विश्वासको मत संविधान विपरीत ठहर गरेको उहाँले बताउनुभयो ।
धारा १६८ (३) अनुसार बन्ने मुख्यमन्त्रीले प्रदेशसभाबाट एक महिनाभित्र विश्वासको मत लिनुपर्नेछ । विश्वासको मत लिन नसके पुनः अर्को सरकार गठन प्रक्रियामा जानुपर्ने अदालतको आदेशमा उल्लेख छ ।
