बुटवल । तत्कालिन एमालेका नेता लिला गिरी नेतृत्वको सरकार ढलेसँगै मुख्यमन्त्री बन्नुभएका नेपाली काँग्रेस लुम्विनी प्रदेश संसदीय दलका नेता डिल्लीवहादुर चौधरीले मुख्यमन्त्रीको पदभार ग्रहण गरेपश्चात् लामो समयसम्म पनि मन्त्रिपरिषद् विस्तार नहुँदा चियोचर्चोको बिषय बन्न पुगेको थियो । तर पछिल्लो समय मुख्यमन्त्री चौधरीले सरकार गठनमा आवद्ध भएका गठबन्धन दलहरुसँग तीव्र छलफल गरी सरकारलाई पूर्णता दिने बिषयमा छलफल गरी तत्काल अगाडि बढाउने संकेत देखिएको छ ।
सत्तागठबन्धनको बसेको बैठकमा नेपाली काँग्रेस, नेकपा माओवादी केन्द्र, जनता समाजवादी पार्टी, लोसपा, नागरिक उन्मुक्ति र नेकपा एकिकृत समाजवादी पार्टीसहितका दलहरूले मन्त्रिपरिषद विस्तार, संसदीय समितिहरूको गठन र सरकारको कार्यप्रगतिको विषयमा छलफल गरेको लुम्विनी प्रदेशका स्वास्थ्यमन्त्री राजु खनालले जनाउनु भएको छ। उहाँले भन्नुभयो, बैठकमा मुख्यमन्त्री ज्यु उपस्थित हुनुहुन्न थियो, तर मन्त्रिपरिषद् विस्तार, संसदीय समितिहरुको गठनका बारेमा आफ्नो तर्फबाट सबै कुराहरु गठबन्धनमा रहेका दलका नेताहरुसँग भनेर उहाँ काठमाण्डौं जानु भएको थियो । बैठकमा नेपाली काँग्रेसका प्रदेश सभापति र प्रमुख सचेतको उपस्थिती रहेको थियो ।
मन्त्री खनालका अनुसार निजामति कर्मचारी ऐन समयमा नबन्दा कर्मचारी नभएर प्रदेशको कामकाज प्रभावित हुँदै आएको छ । वजेट र कर्मचारी विधेयकले गर्दा मन्त्रिपरिपद् विस्तार कार्य ढिला भएको हो, उहाँले भन्नुभयो । यो समस्यालाई छिट्टै नै समाधान गर्नुपर्छ भन्ने बिषयमा गठबन्धन दलहरुबिच सहमति जुटेको छ । अबको केही दिनमै लुम्विनी प्रदेश सरकारकोे मन्त्रिपरिषद्ले पूर्णता पाउने बताउनु भएको छ ।
