काठमाडौं । नेकपा एमालेका अध्यक्ष केपी शर्मा ओलीले, आफूले राष्ट्रको अहित हुने काम कुनै पनि हालतमा नगर्ने दाबी गर्नुभएको छ ।
शनिबार काठमाडौंमा आयोजित ‘बा सँग विद्यार्थी ’कार्यक्रममा विद्यार्थीहरूले उठाएका प्रश्नको जवाफ दिदै उहाँले राष्ट्रको सम्पत्तिलाई छलकपट गरेर आफूले दुरुपयोग नगर्ने र जे गरे पनि ईमान्दारीताका साथ गर्ने दाबी गर्नुभएको हो ।
उहाँले भन्नुभयो,‘म अब्बल नेता त होइन । तर ईमानका साथ काम गर्छु । ईमानदार प्रयास गर्छु । देशलाई माया गर्छु जनतालाई माया गर्छु । कुनै हिसाबले पनि चलखेल, छलकपटले राज्यको सार्वजनिक सम्पत्ति आफ्नो बनाउनु हुँदैन भन्ने मान्यता राख्छु । र जे गर्छु ईमान्दारीताका साथ गर्छु ।’
उहाँले आफूले नेपालविरुद्धको षड्यन्त्रलाई पराजित गर्न नसकेको भन्दै नयाँ पुस्तालाई देशको भूगोल र राष्ट्रियहितको रक्षा गर्न सक्ने गरी तयारी गर्न आग्रह गर्नुभयो । उहाँले भन्नुभयो,‘म अब्बल नेता होइन ।
अब तपाईहरु जस्तै नयाँ पुस्ताले अब्बल नेता जन्माउनुपर्छ । नेपालविरुद्धको षड्यन्त्रलाई पराजित गर्न सकेको छैन । हाम्रो भूगोल र राष्ट्रिय हितको रक्षा गर्न सक्ने हुनुपर्छ ।’
