देउखुरी । लुम्बिनी प्रदेश सरकारले अट्वारी पर्वको अवसरमा आज सार्वजनिक बिदा गरेको छ । आदिवासी थारु समुदायले मनाउने अट्वारी पर्वको अवसरमा ती प्रदेशहरूमा सार्वजनिक बिदा दिइएको हो ।
अट्वारी पर्वमा थारु जातिले महाभारतका प्रमुख पात्र पाँच पाण्डवमध्येका माइलो भाइ भीमको श्रद्धापूर्वक पूजाआजा गर्दछन् । ‘भेंवा’ को नामले थारु जातिले पुकारेर थारु समुदायमा पूजा गरिन्छ ।
किम्वदन्ती अनुसार कुनै बेला भेवा (भीम) घुम्दै जाँदा तराई (थारु बसोबास गरेको ठाउँ) मा पुगेको र त्यो समय तराई क्षेत्रमा एउटा राक्षसले उत्पात मच्चाउने, दुःख दिने, चेलीहरूमाथि जबरजस्ती गर्ने कामलाई तीव्रता दिएका थिए । ती सबै समस्याबाट भीमले मुक्त गरेको हुँदा उनको सम्झनामा अट्वारी पर्व मनाउने प्रचलन थारु समुदायमा रही आएको हो ।
अट्वारी पर्व लुम्बिनी प्रदेशको दाङ, बाँके, बर्दिया र सुदूरपश्चिमका कैलाली र कञ्चनपुर जिल्लाका साथै थारु जातिले मनाउँदै आएका छन् ।
