काठमाडौं । नेकपा एकीकृत समाजवादीका अध्यक्ष माधव कुमार नेपालले अन्तरपार्टी निर्देशन (अपानी)मा देखिएको समस्या पार्टी भित्रैबाट हल गरिने बताउनुभएको छ । बिहीबार पार्टी कार्यालयमा आयोजित सपथ ग्रहण कार्यक्रमपछि सञ्चारकर्मीसंग कुरा गर्दै अध्यक्ष नेपालले अपानीमा मतभेद नभइ केहि प्रश्नहरु आएको भन्दै पार्टी भित्रैबाट हल गरिने बताउनुभएको हो ।
अपानीमा पार्टीका सम्मानित नेता झलनाथ खनालले गरेको टिप्पणीका बारे सोधिएको प्रश्नमा अध्यक्ष नेपालले पार्टीभित्रको बिषय सडकमा लाने काम पार्टीको जिम्मेवार मान्छे र अनुशासन बुझेको मान्छेले नगर्ने जिकिर गर्नुभयो । खनालले अध्यक्ष नेपालले एकलौटी गरेको भन्दै नेताहरूको कार्यविभाजन सच्याउन माग गर्दै आउनुभएको छ ।
त्यस्तै उहाँले सरकारले राम्रो काम गरिरहेको भन्दै अझै राम्रो काम गरेर जनताको विश्वास जित्नुपर्ने धारणा राख्नुभयो । अध्यक्ष नेपालले अहिले शिक्षकहरुको आन्दोलनप्रति सरकार गम्भीर हुनुपर्ने र वार्ता तथा छलफलबाट निकास निकाल्नुपर्ने उल्लेख गर्नुभयो ।
अध्यक्ष नेपालले केन्द्रीय कमिटीको छैटौ बैठकले केन्द्रीय कमिटीका सदस्यहरु मनोनित गरिएकाहरु मध्ये १३ जनालाई विधान अनुसार सपथ गराइएको जानकारी दिनुभयो । सपथ ग्रहणका क्रममा उहाँले युवाहरुको जोश र पुरानाका अनुभवलाई समेटिएर पार्टीलाई मजबुद ढंगले अघि बढाइने जिकिर गर्नुभयो ।
