देउखुरी । लुम्बिनी प्रदेशका मुख्यमन्त्री डिल्लीबहादुर चौधरीले संघीयताको सुदृढीकरणका लागि सहयोग सहकार्य र समन्वयको आवश्यकता रहेको बताएका छन् । १६औँ गणतन्त्र दिवसको अवसरमा शुभकामना व्यक्त गर्दै चौधरीले तीन तहका सरकार बीच अधिकारको बाँडफाँडसंगै संविधानले संरक्षित र सुरक्षित गरेको लोकतान्त्रिक गणतन्त्रात्मक शासन व्यबस्था सामाजिक एवं राजनीतिक रूपमा संस्थागत हुँदै गइरहेको बताए ।
मुख्यमन्त्री चौधरीले संघीय लोकतान्त्रिक गणतन्त्र घोषणा भएको ऐतिहासिक दिनलाई स्मरण गर्दै यो व्यवस्था स्थापनाका लागी महत्वपूर्ण भूमिका खेल्ने सम्पूर्णलाई प्रशंसा गर्दै आफ्नो अमूल्य जीवन बलिदान गर्नुहुने अमर सहिदहरूप्रति भावपूर्ण श्रद्धाञ्जली अर्पण गरेका छन् ।
गणतन्त्र दिवसले मुलुकको सार्वभौमिकता, स्वाधीनता, भौगोलिक अखण्डता, र राष्ट्रिय एकतालाई अझ सुदृढ गर्दै न्यायमा आधारित आर्थिक समृद्धि हासिल गरी सभ्य, सुसंस्कृत तथा समुन्नत समाज निर्माणको बाटोमा अघि बढ्न सहयोग पुग्ने विश्वास व्यक्त गर्दै प्रदेशका नागरिकहरुलाई आर्थिक समृद्धिको बाटो लैजान लाग्ने बताए ।
