जनकपुरधाम - मिथिला माध्यमिकी परिक्रमा आज समापन हुँदै छ । आज बिहानैदेखि जनकपुरधामको अन्तरगृह परिक्रमा गरी १५ दिने पद यात्रा मिथिला मध्यमा परिक्रमा सम्पन्न हुन लागेको हो ।
मध्यमा तथा अन्तगृहम परिक्रममा यसवर्ष पनि हजारौं श्रद्धालुहरु सहभागी भएका छन् । अन्तरगृहम परिक्रममा तीर्थालु तथा श्रद्धालुको झनै भीड देखिएको छ ।
विभिन्न प्रकारका रोग, दुःख, कष्टबाट मुक्ति एवम् नोवाञ्छित फल प्राप्त हुने धार्मिक जनविश्वाससहित हजारौं नरनारी परिक्रममा सहभागी हुने गर्दछन् ।
फागुन औसींका दिन धनुषाको मिथिलाबिहारी नगरपालिका ८ स्थित मिथिलाबिहारी मन्दिरबाट मिथिला बिहारीको डोलासहित परिक्रमा सुरु भएको थियो ।
१५ दिने परिक्रममा जनकपुरको हनुमान नगर, विहारको कलनास्थित कल्यानेश्वर,भारतकै फुलहरस्थित गिरिजा स्थान, महोत्तरीको मठिहानी, जलेश्वर, मडै, धुव्रकुण्ड, कञ्चनवन, पर्वता, धनुषाधाम, सतोखर, औरही, करुण (भारत),विसौल (भारत) र यात्राको अन्तिम दिन अर्थात १५ औ दिन जनकपुरको अन्तरगृहपरिक्रम गरि मध्य परिक्रमा सम्पन्न हुने गर्दछ ।
माध्यमिकी परिक्रममा सहभागि नहुने अधिकांश श्रद्धालु भक्तजन अन्तिम दिन जनकपुरको अन्तरगृह परिक्रममा सहभागी हुने गर्दछन् । यस परिक्रममा युवायुवतीहरुको संख्या पनि उल्लेखनीय रहन्छ ।
परिक्रममा रामजानकीको डोलासँगै परम्परागत बाजाँगाजा सहितका मौलिक पहिरनमा लाखौ नरनारीहरु सहभागिता हुने गर्छन् । टायर गाडा ,साइकल र टाउकोमा बन्दोबस्तीको समान लिएर प्रत्येक दिन स्थान परिवर्तन गरि बास बस्नु, भुईं खनेर चूल्हो निर्मण गर्नु, खाना पकाउनु, भजन कीर्तनलगायतका कार्यहरु गर्नु परिक्रमा यात्री श्रद्धालुहरुको आस्था हो । पक्रिमाको क्रममा रात्रि विश्राम गर्नै पार्ने स्थलहरुमा स्थानीयहरुले मेलाको आयोजन गर्ने गर्दछन् ।
नेपालको धनुषा, महोत्तरी, सर्लाही, सिराहा, सप्तरीलगायत भारत बिहारको सितामढी, मधुबनी, दरभंगा सहितका स्थानबाट प्रायः हजारौं वृद्धवृद्धाहरुको सहभागिता रहन्छ ।
आज अन्तरगृह परिक्रमा सकिएपछि जनकपुरधामसहित मिथिलाञ्चल क्षेत्रमा भोलि होली खेलिने छ । परिक्रमा समापनको भोलिपल्ट मिथिलाञ्चल क्षेत्रमा होली मनाउने परम्परा रहिआएको छ ।
