काठमाडौँ । प्रधानमन्त्री केपी शर्मा ओलीले अनुसन्धान र अभियोजन प्रक्रियालाई प्रविधि प्रयोगसहित प्रमाणमूलक र प्रभावकारी बनाउनुपर्नेमा जोड दिएका छन्। प्रहरी र सरकारी वकिलहरूको तेस्रो राष्ट्रिय सम्मेलनको आज उद्घाटन गर्दै प्रधानमन्त्री ओलीले अन्याय न्यूनीकरण र सामाजिक सुप्रबन्ध कायम गर्न गहिरो अनुसन्धान, अध्ययन तथा समयानुकूल कानुन निर्माण अपरिहार्य रहेको उल्लेख गरे।
"प्रमाणहरू यस्ता हुनुपर्छ जसले दुविधारहित रूपमा न्याय सम्पादनमा सहयोग पुर्याओस्," प्रधानमन्त्री ओलीले भने, "प्रहरीमा निष्पक्षता, पारदर्शिता र स्वच्छता हुनुपर्छ। सरकार स्रोत, साधन र सेवा–सुविधाको व्यवस्था गर्न प्रतिबद्ध छ।"
उनले प्रविधिको सहायताले अपराध नियन्त्रण गर्नुपर्ने आवश्यकता औँल्याउँदै अपराधीहरूले नयाँ प्रविधिको प्रयोग गरेर अपराध लुकाउने प्रयास गर्ने भएकाले प्रहरीको अनुसन्धानसमेत समयसापेक्ष र त्रुटीरहित हुनुपर्ने बताए।
गृहमन्त्री रमेश लेखक, महान्यायाधिवक्ता रमेश बडाललगायतको उपस्थिति रहेको कार्यक्रममा प्रधानमन्त्री ओलीले दोषीलाई कारबाही र पीडितलाई न्याय दिलाउने कार्यमा सबै निकाय गम्भीर हुनुपर्ने धारणा राखे।
प्रहरी प्रधान कार्यालय, नक्सालमा आयोजित दुई दिने सम्मेलनले अनुसन्धान र अभियोजन सुधारका सन्दर्भमा महत्वपूर्ण निष्कर्षसहित घोषणापत्र जारी गर्ने बताइएको छ।
