काठमाडौं l संघीय लोकतान्त्रिक मोर्चाको केन्द्रीय मूल समितिको बैठक आज शंखमुलस्थित होटल ए–वन प्यालेसमा सम्पन्न भएको छ। बैठकमा मोर्चाका अध्यक्ष वृषेश चन्द्र लालको अध्यक्षतामा विभिन्न महत्वपूर्ण विषयहरूमा छलफल गरिएको छ ।

बैठकमा रुपन्देही संघीय संसदीय क्षेत्र नं. ३ मा हुने उपनिर्वाचनका सन्दर्भमा मोर्चाको साझा उम्मेदवारको टुंगो लगाउने विषयमा छलफल गरिएको थियो। साथै, संघीयताको मर्मअनुरूप प्रादेशिक राजनीतिक दलको आवश्यकता र त्यसका लागि आवश्यक कानुनी व्यवस्था विषयमा पनि विस्तृत विमर्श भएको मोर्चाले जनाएको छ ।

निजामती सेवा ऐनमा देखिएका त्रुटिहरू, संवैधानिक नियुक्तिसम्बन्धी सर्वोच्च अदालतको पछिल्लो फैसलाबारे पनि बैठकमा चर्चा गरिएको छ। साथै, मोर्चाको प्रतिबद्धता पत्र तथा लेटरप्याड छपाई, आगामी कार्यक्रमको तयारी र विविध विषयमा निर्णय गर्न बैठक केन्द्रित रहेको थियो ।

तराई (मधेश लोकतान्त्रिक पार्टी)का अध्यक्षसमेत रहेका वृषेश चन्द्र लालले बैठकलाई सम्बोधन गर्दै संघीय लोकतन्त्रलाई मजबुत बनाउन मोर्चाको भूमिका थप सशक्त र सक्रिय बनाउनुपर्नेमा जोड दिनुभयो। बैठकमा मोर्चाका वरिष्ठ नेताहरूको उल्लेखनीय उपस्थिति रहेको थियो ।