काठमाडौं । नेपाली कांग्रेसको १५औँ महाधिवेशनअन्तर्गत केन्द्रीय कार्यसमितिको निर्वाचनका लागि उम्मेदवारी दर्ता प्रक्रिया सोमबारदेखि औपचारिक रूपमा सुरु हुने भएको छ।
कांग्रेस केन्द्रीय निर्वाचन समितिले सार्वजनिक गरेको कार्यतालिकाअनुसार असोज १९ गते सोमबार दिउँसो २ बजेदेखि साँझ ६ बजेसम्म काठमाडौंस्थित राष्ट्रिय सभा गृहमा उम्मेदवारहरूको मनोनयनपत्र दर्ता गरिनेछ।
निर्वाचन समितिका सदस्य–सचिव राजु कडुवालद्वारा जारी विज्ञप्तिमा तोकिएको समयभित्र केन्द्रीय महाधिवेशन प्रतिनिधि तथा महाधिवेशनबाट उम्मेदवार बन्न योग्य व्यक्तिले आफ्नो मनोनयनपत्र दर्ता गर्न सक्ने उल्लेख छ।
मनोनयन दर्ताको मिति तय भएसँगै कांग्रेस महाधिवेशनमा सभापति, पदाधिकारी तथा केन्द्रीय सदस्य पदका आकांक्षीहरूको उम्मेदवारी प्रक्रिया औपचारिक रूपमा अघि बढ्ने भएको छ। विभिन्न पदका आकांक्षीहरूले यसअघि नै उम्मेदवारी घोषणा गर्ने क्रमलाई तीव्र बनाउँदै आएका छन्।
केन्द्रीय निर्वाचन समितिले उम्मेदवार बन्न इच्छुक महाधिवेशन प्रतिनिधिहरूलाई निर्धारित समयभित्र राष्ट्रिय सभा गृहमा पुगेर मनोनयनपत्र दर्ता गर्न आग्रह गरेको छ।
निर्वाचन समितिले केन्द्रीय कार्यसमितिको निर्वाचनसम्बन्धी अन्य विस्तृत कार्यक्रम भने पछि सार्वजनिक गर्ने जनाएको छ। मनोनयन दर्ता सुरु भएसँगै कांग्रेसको १५औँ महाधिवेशनमा नेतृत्व चयनको प्रक्रिया थप निर्णायक चरणमा प्रवेश गर्ने भएको छ।
