काठमाडौं । नेपाली कांग्रेसको १५औँ महाधिवेशनमा कालिकोटबाट युवा नेताका रूपमा सर्वसम्मत चयन भएका जीवन सुवेदीले केन्द्रीय सदस्य पदमा उम्मेदवारी दिने घोषणा गरेका छन्। युवाको प्रतिनिधित्व गर्दै पार्टीको केन्द्रीय नेतृत्वमा पुग्ने लक्ष्यसहित उनले उम्मेदवारी घोषणा गरेका हुन्।
सानै उमेरदेखि विद्यार्थी राजनीतिमा सक्रिय सुवेदी व्यवसायसँगै राजनीतिक गतिविधिमा समेत निरन्तर क्रियाशील रहँदै आएका छन्। उनले डिप्लोमा इन्जिनियरिङ अध्ययन गरेका छन् भने राजनीतिशास्त्रमा स्नातक तहको शिक्षा हासिल गरेका छन्।
कांग्रेसको १५औँ महाधिवेशनका लागि कालिकोटबाट सर्वसम्मत निर्वाचित सुवेदी पार्टीभित्र सुरुदेखि नै सभापति गगन थापानिकट युवा नेताका रूपमा परिचित रहेको बताइन्छ। उनको परिवार लामो समयदेखि नेपाली कांग्रेसमा आबद्ध रहँदै आएको छ। परिवार २०५४ सालदेखि नै कांग्रेसको राजनीतिमा सक्रिय रहेको सुवेदीको भनाइ छ।
माओवादी द्वन्द्वको कठिन समयमा समेत आफ्नो परिवार कांग्रेसको विचार र संगठनसँगै उभिएको उनले बताएका छन्। कालिकोटबाट महाधिवेशन प्रतिनिधि हुँदै सर्वसम्मत चयन हुनु आफ्नो परिवारको कांग्रेस राजनीतिक यात्रामा महत्वपूर्ण उपलब्धि भएको सुवेदीको बुझाइ छ।
सुवेदी आगामी २०८२ फागुन २१ गते हुने आमनिर्वाचनका लागि प्रत्यक्षतर्फ उम्मेदवारका रूपमा समेत सिफारिस भएका छन्। युवा पुस्ताको सहभागिता, संगठन सुदृढीकरण र जिल्लाको राजनीतिक प्रतिनिधित्वलाई प्राथमिकतामा राख्दै उनले कांग्रेसको केन्द्रीय नेतृत्वमा आफ्नो भूमिका खोजेका छन्।
कालिकोटबाट सर्वसम्मत चयन भएर केन्द्रीय सदस्यमा उम्मेदवारी घोषणा गरेसँगै सुवेदीको राजनीतिक यात्रालाई जिल्लाको युवा पुस्ताको प्रतिनिधित्वसँग जोडेर हेरिएको छ।
