बुटवल । लुम्बिनी प्रदेशका मुख्यमन्त्री चेतनारायण आचार्य मिडियाप्रति आक्रामक शैलीमा प्रस्तुत भएका छन्। राष्ट्रिय टेलिभिजन प्रसारण संघ लुम्बिनीको शनिबार भएको पद हस्तान्तरण कार्यक्रममा बोल्दै उनले कुनै मिडियालाई पक्षपाती व्यवहार नगरेको दाबी गरे ।
"मैले कसैलाई विज्ञापन दिन भनेको प्रमाण ल्याउनुस्, म फाँसी चढ्न तयार छु," उनले स्पष्ट शब्दमा भने ।
मुख्यमन्त्री आचार्यले १२ वटै जिल्लाका मिडियालाई समान दृष्टिले हेरेको र आफू मिडिया मैत्री रहेको पनि बताए। केही वक्ताले मिडियामा विभेद गरिएको आरोप लगाएका थिए, जवाफमा उनले "भए सबै मेरा आसेपासे हुन्, मेरो कुनै आसेपासे छैन" भन्दै प्रतिक्रिया दिए ।
उनले लुम्बिनी सञ्चार समन्वय परिषदलाई अधिकार सम्पन्न बनाउन कानुन संशोधनको तयारी भइरहेको जनाउँदै मिडियाको सबलीकरणमा सरकार प्रतिबद्ध रहेको बताए ।
कार्यक्रममा संघका नवनिर्वाचित अध्यक्ष गोपाल ज्ञवालीलाई निवर्तमान अध्यक्ष नरेश केसीले पद हस्तान्तरण गरेका थिए ।
