काठमाडौं– नेपाली कांग्रेस केन्द्रीय कार्यसमितिको बैठक आज पनि बस्दैछ । बैठक पार्टीका कार्यवाहक सभापति पूर्णबहादुर खड्काको सभापतित्वमा बिहान साढे ११ बजे केन्द्रीय कार्यालय सानेपामा बस्नेछ ।
गत असोज २८ गते सुरु भएको बैठकमा केन्द्रीय सदस्यहरूले धारणा राख्ने क्रम जारी रहेको छ । हिजो (मंगलबार)को बैठकमा पार्टीको १५औँ महाधिवेशनबारे दुई फरक प्रस्ताव प्रस्तुत भएका छन् ।
महामन्त्री थापाले आगामी पुस १६ देखि १९ सम्म १५औँ केन्द्रीय महाधिवेशन गर्नुपर्ने प्रस्ताव गरेका छन् भने सहमहामन्त्री महेन्द्र यादवले वैशाख २७ देखि ३० गतेसम्म गर्नुपर्ने फरक प्रस्ताव प्रस्तुत गरेका छन् ।
मंगलबारको बैठकमा महामन्त्री थापा, सहमहामन्त्री यादव, कोषाध्यक्ष उमेश श्रेष्ठ, केन्द्रीय सदस्यहरू कृष्णप्रसाद सिटौला, डा. चन्द्रकान्त भण्डारी, कर्णबहादुर बुढा, डा. रणबहादुर रावल, दिलमान पाख्रिन, कुन्दनराज काफ्ले, राधा घले र शारदा पौडेलले आ–आफ्नो धारणा व्यक्त गरेका थिए । बाँकी सदस्यले आज बोल्ने छन् ।
