काठमाडौं । नेपाली कांग्रेसका केन्द्रीय सदस्य कल्याण गुरुङले पार्टीभित्र व्यक्ति–केन्द्रित राजनीति होइन, असली शासकीय प्रणाली र नीतिगत स्पष्टतामा आधारित सुधार नै दीगो परिवर्तनको मुख्य बाटो भएको बताएका छन् ।
गुरुङले कांग्रेसका महामन्त्री विश्वप्रकाश शर्माले सामाजिक सञ्जालमा राखेको अभिव्यक्तिप्रति सम्मानका साथ प्रतिक्रिया जनाउँदै भनेका छन् -“दीगो परिवर्तनका लागि व्यक्ति होइन, असल शासकीय प्रणाली र नीतिगत स्पष्टता आवश्यक हुन्छ ।”
फेसबुकमा उनले लेखेका विस्तृत धारणा अनुसार, गुरुङले अहिलेको मुलुकमा देखिएको प्रमुख समस्या बोली र व्यवहारबीचको असमानता रहेको उल्लेख गर्दै जनतामा त्यसले निराशा फैलाएको बताए ।
नेता गुरुङले “आम नागरिकले भ्रष्टाचारप्रति शून्य सहनशीलता र दण्डहीनताको अन्त्य चाहेका छन् । असल प्रणालीले पपुलिज्म, व्यक्तिगत भक्ति, गुणगान र साईबर प्रचारको संस्कृति स्वीकार्दैन,” उनले लेखेका छन् ।
गुरुङले थपे, “शासन, सत्ता, संवैधानिक निकाय र राज्य संयन्त्रमा सीमित समुदाय वा व्यक्तिहरुको एकाधिकारमा आमूल परिवर्तन आवश्यक छ ।” शान्तिपूर्ण, अहिंसात्मक र विवेकपूर्ण माध्यमबाट परिवर्तनको पक्षमा आफू रहेको स्पष्ट पार्दै भनेका छन् - “मैले खोजेको परिवर्तन माया, प्रेम, सद्भाव र सहिष्णुताको परिवर्तन हो; घृणा र ईर्ष्याको होइन।”
उनका अनुसार, नेपालले दीगो राजनीतिक स्थायित्वका लागि केवल बहुदलीय संसदीय प्रणालीमै सीमित नबसि अन्य शासकीय मोडलहरू जस्तै प्रत्यक्ष निर्वाचित प्रधानमन्त्री, राष्ट्रपति वा स्विजरल्याण्डको फेडरल काउन्सिल मोडल - माथि पनि खुला बहस गर्नुपर्ने समय आएको छ ।
गुरुङले दक्षिण एशियाली देशहरूमा संसदीय प्रणालीले किन प्रभावकारी रूपमा काम गर्न नसकेको प्रश्न उठाउँदै भने, “कुनै पनि शासन प्रणालीको पहिलो र मुख्य तत्व भनेको जनताले त्यसप्रति राखेको विश्वास हो ।” अन्त्यमा नेता गुरुङले लेखेका छन् “मैले खोजेको परिवर्तन प्रणालीमा, आचरणमा र व्यवहारमा आमूल सुधार हो; जुन सबै नेपालीमा समान अधिकार, अवसर र भरोसा जगाउने प्रकारको हो।”
