काठमाडौं l नेपालको लोकतान्त्रिक इतिहासका निडर योद्धा तथा २०४६ सालको जनआन्दोलनका सर्वोच्च कमाण्डर गणेशमान सिंहको १११औँ जन्मजयन्तीका अवसरमा नेपाली कांग्रेसका नेता तथा पूर्वप्रधानमन्त्री प्रकाशमान सिंहले आज उहाँको सालिकमा माल्यार्पण गरी श्रद्धाञ्जलि अर्पण गर्नुभएको छ ।
ललितपुरस्थित गणेशमान सिंह स्मारक परिसरमा आयोजित कार्यक्रममा प्रकाशमान सिंहले जनआन्दोलनका महानायकप्रति श्रद्धा व्यक्त गर्दै भन्नुभयो- “जहानिया राणाशासन र पञ्चायती अन्धकार अन्त्य गरी नागरिकलाई प्रजातन्त्रको उज्यालो दिलाउन उहाँले गरेको कठिन संघर्ष सदैव स्मरणीय छ।”
नेता सिंहले थप भन्नुभयो- “आफूले जेल–नेल, निर्वासन र बर्बर यातना सहेर पनि नेपाली जनतालाई रैतीबाट नागरिक बनाउने कार्य गणेशमान सिंहकै अदम्य साहसको फल हो।
उहाँको सत्य, निष्ठा र त्यागको बाटोमा नेपाली कांग्रेस डगमगाउने छैन।” गणेशमान सिंहले आफ्नो जीवनभर प्रजातन्त्र, मानवअधिकार र राष्ट्रिय स्वाभिमानका लागि अविचल संघर्ष गर्नुभएको थियो।
उहाँको नेतृत्वमै २०४६ सालको ऐतिहासिक जनआन्दोलनले मुलुकमा बहुदलीय प्रजातन्त्र पुनःस्थापित गरेको थियो । नेपालका राजनीतिक इतिहासमा “लाेहपुरुष” का रूपमा चिनिने गणेशमान सिंहप्रति देशभर श्रद्धाञ्जलि कार्यक्रमहरू आयोजित भइरहेका छन्।
उहाँको आदर्श र योगदानप्रति कांग्रेस नेता तथा कार्यकर्ताले ‘सच्चा लोकतन्त्रको प्रेरणास्रोत’का रूपमा स्मरण गरिरहेका छन् ।
