काठमाडौं– राष्ट्रिय स्वतन्त्र पार्टी परित्याग गरेका सन्तोष परियार, प्रगतिशील राष्ट्रिय अभियानका संयोजक सुदन किराती र नेपाल समाजवादी पार्टी नयाँ शक्तिकी संयोजक दुर्गा सोबबीच पाँच बुँदे सहमतिमा हस्ताक्षर भएको छ।
उनीहरूबीच ललितपुरमा भएको लामो वार्तापछि सहकार्य गरेर अगाडि बढ्न पाँच बुँदे सहमति भएको हो।
सहमतिपछि जारी गरिएको पत्रअनुसार नेपालको राजनीतिक समग्र पुनर्संरचना गर्ने लक्ष्यसहित नेपाल समाजवादी पार्टी नयाँ शक्ति प्रगतिशील राष्ट्रिय अभियान र प्रतिनिधिसभाका निवर्तमान सदस्य सन्तोष परियार एक मत भएको उल्लेख छ ।
सहमतिमा एकता तथा ध्रुवीरणका लागि नयाँ बन्ने एकीकृत पार्टीको नाम र चुनाव चिह्न एउटै बनाउने उल्लेख छ। सहमतिमा मङ्सिर ७ गते बृहत् एकता घोषणा कार्यक्रम गर्ने सहमति भएको बताइएको छ।
सहमतिको चौथो बुँदामा देश तथा विदेशमा बस्ने प्रगतिशील लोकतान्त्रिक वामपन्थी र देशभक्त शक्तिहरू र विशेषगरी जे-नजी पुस्तालाई बृहत राजनीतिक पुनरसंरचनाको अभियानमा सहभागी हुन आह्वान गरिएको छ।
सहमतिपत्रमा माओवादी छोडेका उपमहासचिव जनार्दन शर्मा प्रभाकरको नाम राखिएको छैन । तर सहमति गर्दा उनी र नेता बाबुराम भट्टराई सहभागी थिए । जनार्दनले सुदनलाई अगाडि सारेर पाँच बुँदे सहमति गराएका हुन्।
