बुटवल l लुम्बिनी प्रदेशका माननीय सभामुख तुलाराम घर्ती मगरले आज लुम्बिनी प्रदेशको गौरवपूर्ण आयोजना लुम्बिनी प्रादेशिक अस्पतालको निर्माणाधीन नयाँ भवनको अवलोकन गर्नुभएको छ ।
अवलोकनका क्रममा प्रदेश पूर्वाधार विकास प्राधिकरणका फिल्ड इन्जिनियर शंकर सुबेदीले निर्माण प्रगति तथा प्राविधिक अवस्थाबारे जानकारी गराएका थिए ।
त्यस्तै अस्पतालका प्रशासन प्रमुख प्रेम गौतमले अस्पतालको समग्र व्यवस्थापन, सेवा विस्तार तथा आगामी योजनाबारे ब्रिफिङ प्रस्तुत गर्नुभएको थियो । सभामुख घर्ती मगरले अस्पतालले संचालन गर्न लागिरहेको मोनोग्राफी (एमआरआई) कक्षको पनि स्थलगत निरीक्षण गर्दै उक्त सेवा समयमै सुरु हुने अपेक्षा व्यक्त गर्नुभयो ।
उहाँले आवश्यक बजेट तथा स्रोत-साधनको अभाव हुन नदिइने प्रतिबद्धता व्यक्त गर्दै, “गौरवको आयोजना भएकाले कामको गुणस्तर र समयसीमा दुवै सुनिश्चित गरिनुपर्छ,” भन्नुभयो ।
अस्पतालमा विशेषज्ञ चिकित्सकको अभाव नरहे पनि एमबिबिएस (मेडिकल अफिसर) तथा नर्सिङ स्टाफको कमी रहेको प्रशासन प्रमुख गौतमले जानकारी दिनुभयो । हाल लुम्बिनी प्रादेशिक अस्पताल ५ सय शय्या क्षमतामा सञ्चालन भइरहेको छ र दैनिक २ सयभन्दा बढी बिरामीले सेवा लिने गर्दछन् ।
