काठमाडौं– नेपाली कांग्रेसका नेता चन्द्र भण्डारीले विशेष महाधिवेशनको नाममा पार्टीलाई विभाजन हुन नदिने बताएका छन् ।
शनिबार काठमाडौंमा पत्रकार सम्मेलन गर्दै भण्डारीले मुलुकको परिवर्तनका लागि कांग्रेसको लामो इतिहास रहेको भन्दै विशेष महाधिवेशनको नाममा पार्टीलाई विभाजन हुन नदिने बताएका हुन् ।
उनले विशेष महाधिवेशनलाई नीति महाधिवेशन वा सङ्कल्प अधिवेशनको रूपमा अघि बढाउन सुझाव दिए । विशेष महाधिवेशनमार्फत काठमाडौं आएका नेता तथा कार्यकर्तालाई उत्साहित बनाएर फेरि चार महिनापछि हुने महाधिवेशनमा आउने गरी घर फर्काउनुपर्ने उनले बताए ।
भण्डारीले विशेष महाधिवेशन पक्षधरले पनि पार्टीलाई एकजुट बनाएर र संस्थापन पक्षले पनि अपनत्व ग्रहण गर्नुपर्नेमा जोड दिए । उनले जने-जी आन्दोलनपछि पार्टीलाई नयाँ ढंगले अघि बढाउन नेतृत्व असफल भएको उल्लेख गरे ।
त्यस्तै कांग्रेसका अर्का नेता सुनिल शर्माले अहिले आफूहरूले पार्टीलाई विभाजन रोक्नका लागि प्रयास गरिरहेको बताए । विशेष महाधिवेशनका विषयमा उत्पन्न विवाद समाधान गर्न प्रयास गरेपनि समाधान उन्मुख नभएको उनले बताए । विधानको व्यवस्थालाई संस्थापन पक्षले बेवास्ता गरेकै कारण वर्तमान परिस्थिति उत्पन्न भएको उनको भनाइ छ ।
नेता शर्माले पार्टी नेतृत्वले नै अहिलेको विवाद मिलाउन मुख्य भूमिका निर्वाह गर्नुपर्नेमा जोड दिए ।
