सर्लाही l नेपाली कांग्रेसका सभापति तथा प्रस्तावित प्रधानमन्त्री उम्मेदवार गगन थापाले मधेशको भूमिबाट आफ्नो राजनीतिक यात्राको नयाँ अध्याय सुरु गरेका छन्।
सर्लाही क्षेत्र नम्बर ४ का मतदातासँग पहिलोपटक प्रत्यक्ष संवाद गर्दै उनले उम्मेदवारी मात्र घोषणा गरेनन्, नेपाली राजनीतिमा आदर, समानता र सहअस्तित्वमा आधारित नयाँ संस्कृतिको स्पष्ट सन्देश दिए । “म प्रश्न उठाउन होइन, त्यसको उत्तर खोज्न आएको छु,” भन्ने थापाको अभिव्यक्तिले उनको सम्पूर्ण सम्बोधनको भाव स्पष्ट पारेको थियो-समस्या औँल्याउने मात्र होइन, समाधानसहितको नेतृत्व ।
सभापति थापाको सम्बोधन चुनावी प्रतिबद्धताको सूचीभन्दा पनि मधेश-पहाड सम्बन्ध पुनःस्थापित गर्ने भावनात्मक दस्तावेजजस्तो देखिन्थ्यो । बीपी कोइरालादेखि प्रदीप गिरीसम्मको कांग्रेस परम्परा स्मरण गर्दै उनले देश निर्माणमा मधेशले पुर्याएको योगदान र त्यसले अझै पाउन नसकेको सम्मानको विषय उठाए।
“समानताको अभ्यास” गर्न आफू मधेश आएको स्पष्ट पार्दै उनले भने, “मधेशलाई समाहित नगरी म सम्पूर्ण रूपमा नेपाली बन्न सक्दिनँ।” यो अभिव्यक्ति राजनीतिकभन्दा बढी सांस्कृतिक आत्मीयताको संकेतका रूपमा लिइयो । तीनपटक काठमाडौंबाट निर्वाचित भएर अनुभव बटुलेका सभापति थापाले सर्लाहीका नागरिकसँग कागजमा होइन, व्यवहारमा प्रतिनिधित्व देखाउने वाचा गरे।
शिक्षा, स्वास्थ्य, सिँचाइ र युवा रोजगारीलाई प्राथमिकता दिँदै उनले यी क्षेत्रमा समाधानमुखी काम गर्न सम्बन्धित टोलीहरू अहिलेबाटै सक्रिय रहेको जानकारी दिए । विशेष रूपमा, सर्लाहीमै “स्थायी सांसद कार्यालय” स्थापना गर्ने प्रतिबद्धताले स्थानीयस्तरमा सकारात्मक सन्देश दिएको छ । “सर्लाहीका नागरिकले सांसद खोज्न काठमाडौं आउनु नपरोस्,” उनले भने ।
गगन थापाको राजनीतिक शैली पुरानो ‘एकपटक आएर हल्लिने’ प्रवृत्तिभन्दा फरक देखियो । उनले यहाँको भाषा, संस्कार र जीवनशैली सिक्ने प्रतिबद्धता व्यक्त गर्दै सर्लाही ४ लाई केवल निर्वाचन क्षेत्र होइन, नेपाली समानताको प्रतीक बनाउने दृष्टि प्रस्तुत गरे । आफूलाई “सेवक नेतृत्व” को प्रतिनिधि भन्दै उनले भने, “म यहाँ नेता होइन, तपाईंहरूको सेवक हुँ ।”
कांग्रेसभित्रको नयाँ सोच र सुधारको प्रतीकका रूपमा प्रस्तुत भएका सभापति थापाले पार्टीको ‘नयाँ अध्याय’ को संकेत पनि दिए। मान, सम्मान र सहअस्तित्वमा आधारित शासन प्रणालीमार्फत कांग्रेसले देशलाई नयाँ ढंगले हाँक्ने उनको भनाइ थियो ।
नेपाली कांग्रेसका सभापति गगन थापाको सर्लाही प्रवेश चुनावी राजनीतिभन्दा धेरै गहिरो सन्देश बोकेको देखिन्छ । नेतृत्व काठमाडौंका कोठाभित्र होइन, जनताको जीवनभित्र खोजिनुपर्छ भन्ने उनको दृष्टिले मधेशमा नयाँ आशा जगाएको छ । यो ऊर्जा र दृष्टिले वास्तवमै नयाँ राजनीतिक संस्कृतिको सुरुवातसँगै त्यस क्षेत्रबाट निर्वाचित पहिलो प्रधानमन्त्रीको रुपमा देख्न पाउनेछ ।
