काठमाडौँ- नेपाली कांग्रेसका पूर्व सांसदहरूले आज सर्वोच्च अदालत जाने भनी तय गरेको कार्यक्रम अन्तिम समयमा आएर स्थगित भएको छ।
प्रधानन्यायाधीश प्रकाशमान सिंह राउतको समय नमिलेका कारण उक्त भेटघाटको कार्यक्रम रोकिएको हो।
कांग्रेसले एक सूचना जारी गर्दै ‘विशेष कारण’ले गर्दा डेलिगेसन टोली सर्वोच्च जाने कार्यक्रम स्थगित भएको जानकारी गराएको छ।
विघटित प्रतिनिधिसभाका पूर्व प्रमुख सचेतक श्यामकुमार घिमिरेका अनुसार प्रधानन्यायाधीशको सचिवालयबाट फोन गरी तत्कालका लागि भेटघाटको समय उपलब्ध हुन नसकेको जानकारी दिइएको थियो।
यसअघि नेता घिमिरेकै नेतृत्वमा बिहान १०:३० बजे ६५ जना पूर्व सांसदहरूको टोली सर्वोच्च जाने तयारीमा थियो।
संसद् पुनर्स्थापनाको माग गर्दै ती सांसदहरूले सर्वोच्चमा रिट दायर गरे तापनि हालसम्म त्यसको सुनुवाइ प्रक्रिया अगाडि बढ्न सकेको छैन।
