काठमाडौं– नेपाली कांग्रेसले सामाजिक सञ्जालमा देखिएका प्रतिक्रिया र विभिन्न चुनावी आँकलनलाई मतदानको आधार मान्न नसकिने स्पष्ट पारेको छ।
शनिबार पार्टी कार्यालय सानेपामा आयोजित पत्रकार सम्मेलनमा प्रवक्ता देवराज चालिसेले सामाजिक सञ्जालमा देखिने टिप्पणी वा अनुमानले वास्तविक जनमत प्रतिनिधित्व नगर्ने बताए। उनले जनताको विश्वास मतपत्रबाट मात्रै प्रष्ट हुने उल्लेख गर्दै जनताको निर्णय नै शासनको वैधताको आधार हुने धारणा राखे।
प्रवक्ता चालिसेले निर्वाचनपछि प्राप्त मतादेशलाई कांग्रेसले सहज रूपमा स्वीकार गर्ने पनि बताए। उनले आसन्न निर्वाचनमा पार्टी एकताबद्ध भएर अघि बढेको उल्लेख गर्दै उम्मेदवारहरू सिद्धान्तका प्रतीक भएको दाबी गरे। ती उम्मेदवारलाई विजयी गराउने दायित्व सबै नेता तथा कार्यकर्ताको रहेको उनको भनाइ छ।
उनले फागुन ३ गते आइतबार चुनावी घोषणा पत्र सार्वजनिक गरिने जानकारी दिँदै त्यसपछि नियमित प्रचार कार्यक्रमसँगै घोषणापत्र केन्द्रित विभिन्न कार्यक्रम आयोजना गरिने बताए।
घोषणापत्रमा मुलुकको यथार्थ अवस्था चित्रण गर्दै सुशासन र विकासका लागि समयसीमा सहितको कार्ययोजना प्रस्तुत गरिने प्रवक्ता चालिसेको भनाइ छ। साथै शासकीय सुधार र जनतासँग प्रत्यक्ष जोडिएका विषयलाई प्राथमिकतामा राखिने उनले स्पष्ट पारे।
