काठमाडौं । साताको तेस्रो कारोबार दिन बुधबार धितोपत्र बजारमा हरियाली छाएको छ। अघिल्लो दिन घटेको सेयर बजारमा सुधार आउँदै नेपाल स्टक एक्सचेन्ज (नेप्से) परिसूचक ४.९९ अंकले बढेर २७८२.१० विन्दुमा बन्द भएको छ। यसअघि गत सोमबार २७ अंकले बढेको बजार मंगलबार भने ९.२४ अंकले घटेर ४ अर्ब ८५ करोड रुपैयाँ बराबरको सेयर कारोबार भएको थियो। बुधबार परिसूचकसँगै कारोबार रकममा पनि उत्साहजनक वृद्धि भएको छ।
यसदिन बजारमा ३५४ वटा कम्पनीका १ करोड ५२ लाख ४९ हजार ७१२ कित्ता सेयर ६ अर्ब ३ करोड ६४ हजार ८४० रुपैयाँमा खरिदबिक्री भएका छन्। कारोबारमा आएका कम्पनीहरूमध्ये १५१ वटाको सेयर मूल्य बढेको छ भने १०५ वटाको घटेको छ। बाँकी १४ वटा कम्पनीको सेयर मूल्य भने स्थिर रह्यो। बुधबार कालिञ्चोक हाइड्रोपावरको सेयर मूल्यमा सकारात्मक सर्किट लागेको छ। यस्तै, बुंगल हाइड्रोको सेयर मूल्य १३.३७ प्रतिशत र क्रिष्ट माइक्रोफाइनान्सको मूल्य ८.५२ प्रतिशतले वृद्धि भएको छ।
कारोबार रकमका आधारमा यसदिन आँखु खोला जलविद्युत आयोजना शीर्ष स्थानमा रह्यो, जसको ७१ करोड रुपैयाँ बराबरको सेयर खरिदबिक्री भयो। यसैगरी राधी पावरको ४३ करोड, नेसनल हाइड्रोपावरको ३२ करोड, अपी पावरको २० करोड र नगदी ग्रुपको १५ करोड रुपैयाँ मूल्य बराबरको सेयर कारोबार भएको छ। बुधबार फाइनान्स, होटल एण्ड टुरिजम तथा म्यानुफ्याक्चरिङ एण्ड प्रोसेसिङ (मनु एण्ड प्रो) समूहको उपसूचकबाहेक बाँकी अन्य सबै उपसमूहका सूचकहरू सकारात्मक देखिएका छन्।
