कपिलवस्तु । कपिलवस्तु नगरपालिका–१ स्थित नयाँटोल चोकमा ट्रकको ठक्करबाट साइकलमा सवार २२ वर्षीया युवतीको मृत्यु भएको छ। बिहीबार दिउँसो कृष्णनगरबाट भैरहवातर्फ जाँदै गरेको ना. ५ ख २३६० नम्बरको ट्रकले साइकलमा सवार कपिलवस्तु नगरपालिका–२ निवासी निशा गद्दीलाई ठक्कर दिएको थियो।
ट्रकको ठक्करबाट गम्भीर घाइते भएकी गद्दीलाई तत्काल उद्धार गरी जिल्ला अस्पताल तौलिहवा लगिएको थियो। तर, उनको उपचारकै क्रममा दिउँसो करिब २ बजे चिकित्सकले मृत्यु भएको घोषणा गरेका थिए।
दुर्घटनापछि प्रहरीले ट्रक र चालकलाई नियन्त्रणमा लिएको छ। प्रहरीले मोरङको सनिश्चरे नगरपालिका–१० का ४३ वर्षीय कृष्णप्रसाद खनाललाई नियन्त्रणमा लिएर घटनाबारे अनुसन्धान अघि बढाएको जिल्ला प्रहरी कार्यालय कपिलवस्तुले जनाएको छ।
साइकलमा यात्रा गरिरहेकी युवतीको ट्रकको ठक्करबाट मृत्यु भएपछि स्थानीय क्षेत्रमा समेत चिन्ता बढेको छ। दुर्घटनाको वास्तविक कारण तथा घटनासँग जोडिएका अन्य विषयबारे प्रहरीले थप अनुसन्धान गरिरहेको जनाएको छ।
