बुटवल । लुम्बिनी प्रदेशका मुख्यमन्त्री चेतनारायण आचार्यले मन्त्रिपरिषद् पुनर्गठन गर्दै तीन जना नयाँ मन्त्री नियुक्त गरेका छन्। एमाले, नेकपा, जसपा र जनमोर्चाको समर्थनमा सरकारको नेतृत्व गरिरहेका आचार्यले नेकपाबाट तीन मन्त्री थपेसँगै मन्त्रालयको जिम्मेवारीसमेत हेरफेर गरेका हुन्।

मन्त्रिपरिषद् पुनर्गठनसँगै कृष्ण कुसुम थारूलाई कृषि तथा भूमि व्यवस्था मन्त्रालयको जिम्मेवारी दिइएको छ। यसअघि कृषि तथा भूमि व्यवस्था मन्त्रालय सम्हालिरहेका तुलसीप्रसाद चौधरीलाई वन, वातावरण तथा पर्यटन मन्त्रालयको जिम्मेवारी दिइएको छ।

त्यस्तै, यसअघि स्वास्थ्य मन्त्री रहेका रामजीप्रसाद घिमिरेलाई सामाजिक विकास मन्त्रालयको जिम्मेवारीमा पठाइएको छ भने स्वास्थ्य मन्त्रालयको जिम्मेवारी दिपेन्द्रकुमार पुनलाई दिइएको छ।

यसअघि सामाजिक विकास मन्त्रालय सम्हालिरहेका सन्तोषकुमार पाण्डेयलाई शहरी विकास, ऊर्जा, सिँचाइ तथा खानेपानी मन्त्रालयको जिम्मेवारी दिइएको छ।

त्यस्तै, रत्नबहादुर खत्रीलाई भौतिक पूर्वाधार विकास मन्त्रालय र भण्डारीलाल अहिरलाई आन्तरिक मामिला, कानुन, उद्योग तथा यातायात मन्त्रालयको जिम्मेवारी यथावत् राखिएको छ।

कांग्रेस सरकारबाट बाहिरिएपछि मन्त्रालय थपघट

नेपाली कांग्रेस सरकारबाट बाहिरिएपछि मुख्यमन्त्री आचार्यले आफैँसँग राख्दै आएको आर्थिक मामिला मन्त्रालयको जिम्मेवारी इन्द्रजित थारूलाई दिइएको छ।

मन्त्रिपरिषद् हेरफेरसम्बन्धी प्रदेश प्रमुखको कार्यालयका सचिव राजेश गौतमद्वारा हस्ताक्षरित पत्र प्रदेशसभा सचिवालयमा पठाइएको छ।

मंगलबार नयाँ मन्त्रीको शपथ

प्रदेश प्रमुखको कार्यालयका अनुसार मुख्यमन्त्री आचार्यको सिफारिसमा मन्त्रिपरिषद् विस्तार तथा पुनर्गठन गरिएको हो। नवनियुक्त मन्त्रीहरूलाई भदौ ९ गते मंगलबार दिउँसो ३ बजे शपथ गराउने तयारी गरिएको छ।

सत्ता समीकरणमा आएको परिवर्तनसँगै लुम्बिनी प्रदेश सरकारको मन्त्रिपरिषद् पुनर्गठन गरिएको हो। नयाँ मन्त्रीको नियुक्तिसँगै मन्त्रालयको जिम्मेवारीसमेत व्यापक रूपमा हेरफेर भएपछि प्रदेश सरकारको आगामी कार्यदिशाबारे चासो बढेको छ।