काठमाडौँ । नेकपा (एमाले)का अध्यक्ष केपी शर्मा ओलीले पार्टीभित्र अस्वस्थ प्रतिष्पर्धामा नउत्रन आग्रह गर्नुभएको छ । शुक्रबार काठमाडौंमा पार्टी उपत्यका विशेष प्रदेश कमिटीको अधिवेशन उद्घाटन गर्दै अध्यक्ष ओलीले पार्टीको प्रदेश अधिवेशनका सन्दर्भमा विरोधीले एकोहोरो खालको टिका टिप्पणी गर्ने मौका पाएको भन्दै अस्वस्थ प्रतिष्पर्धामा नउत्रन आग्रह गर्नुभएको हो ।
उहाँले अहिलेसम्म लडेभिडे भन्ने सन्देश प्रवाहित भएकाले उपत्यका विशेष प्रदेश कमिटीको नेतृत्वय चयनमा अर्को टिका टिप्पणी गर्ने मौका दिन नहुने बताउनुभयो । पार्टीभित्रको प्रतिष्पर्धामा पनि जित्नका लागि बिभिन्न अभ्यास गरेको जस्तो देखिएकाले सहमति नै जान उहाँले सुझाव दिनुभयो ।
ओलीले पार्टीका हरेक व्यक्तिको काम नेतृत्वले मूल्याङ्कन गर्ने भएकाले नेतृत्वको मूल्यांकनमा भर नपर्दा समस्या देखिन सक्ने तर्क गर्नुभयो । ओलीले पार्टीको आन्तरिक चूनावलाई जित्दा उन्माद चढ्जस्तो गर्ने र हार्दा निराश हुने अवस्था आउन दिन नहुनेमा जोड दिनुभयो ।
