झापा । दुर्गा प्रसाईका सर्मथकहरुले झापामा एक दर्जनभन्दा बढी गाडीमा तोडफोड गरेका छन्। राष्ट्रिय युवा संघ अर्जुनधारा नगर कमिटीको प्रथम नगर अधिवेशनलाई सम्बोधन गर्न बिहीबार झापा पुग्नुभएका नेकपा एमालेका पोलिटब्युरो सदस्य महेश बस्नेतलाई अवरोध गर्न कार्यक्रम स्थल पुगेका पहिचानवादीहरूले नेता तथा कार्यकर्ताका सवारीसाधन माथि तोडफोड गरेका हुन्।
कडा सुरक्षा घेरामा कार्यक्रम स्थलभित्र पूर्व मन्त्री समेत रहेका युवा नेता बस्नेत भाषण गरिरहेका बेला सडकमा छरिएर रहेका पहिचानवादी र दुर्गा प्रसाईँ समर्थकहरूले ढुंगामुढा गरी सडक किनारमा पार्किङ गरी राखिएका एक दर्जन बढी सवारीसाधनहरूको सिसाहरू फुटाएको प्रहरीले जनाएको छ ।
नेता बस्नेत सहभागी भएको कार्यक्रमलाई बिथोल्न पहिचानवादी र दुर्गा प्रसाईँ समर्थकहरूले सडकमा नाराबाजी गर्दै ढुंगामुढा गरेका थिए। युवा संघका कार्यकर्ता र पहिचानवादी, दुर्गा प्रसाईँ समर्थक बीच हुनसक्ने झडपलाई मध्यनजर गरी ठूलो सङ्ख्यामा सशस्त्र र नेपाल प्रहरी परिचालन गरिएको थियो।
प्रहरीकै घेराबन्दीमा युवा नेता बस्नेत कार्यक्रम स्थल पुग्दा उनीहरूले कालोझण्डा देखाउँदै चर्को नाराबाजीसमेत गरेका थिए। राजधानीको एक होटेलमा दुर्गा प्रसाईँलाई कालोमोसो दलेपछि प्रसाईँ पक्षधरहरूले विभिन्न स्थानमा विरोघ गर्दै आएका छन् ।
