देउखुरी । नेपाली कांग्रेस लुम्बिनी प्रदेश समितिले राष्ट्रिय सभाको निर्वाचनका लागि कैफियत खुलाएर केन्द्रमा उम्मेदवारको नाम सिफारिस गर्ने भएको छ ।
नेपाली कांग्रेसको प्रदेश कार्यालय देउखुरी मा आज बसेको नेपाली कांग्रेस लुम्बिनी प्रदेश संसदीय दलको बैठकले राष्ट्रिय सभाका लागि जिल्लाबाट आएका उम्मेदवारको नाममा कैफियत खुलाएर सबै नाम सिफारिस गर्ने निर्णय गरेको छ ।
पूर्वी रुकुम बाहेक प्रदेशका ११ वटै जिल्लाबाट सिफारिस भएर आएका १ सय २३ जना उम्मेदवारको नाम सबै केन्द्रमा सिफारिस गर्ने तर सबै उम्मेदवारको हालको अवस्था, गत निर्वाचनमा खेलेको भूमिका लगायतका पृष्ठभूमि खुलाएर मात्र नाम सिफारिस गर्ने निर्णय गरेको हो ।
नेपाली कांग्रेसका लुम्बिनी प्रदेश सभापति अम्बर सिंह पुनको अध्यक्षतामा बसेको बैठकले सरकार र पाटी बिचको सम्बन्ध सुमधुर बनाएर लैजाने पनि निर्णय गरेको श्रोतले बताएको छ।
बैठकमा लुम्बिनी प्रदेशका मुख्य मन्त्री डिल्ली चौधरीको पनि सहभागिता रहेको थियो ।
