काठमाडौँ । कृषि, सहकारी तथा प्राकृतिक स्रोत समिति सभापति आरजु राणा देउवाले विवाह लाइसेन्सको व्यवस्था गर्न आवश्यक रहेको तर्क उल्लेख गर्नुभयो ।
बिहीबार ललितपुरमा भएको एक कार्यक्रममा बोल्दै नेपाली काँग्रेसकी नेत्री राणाले यस्तो बताउनुभएको हो। सानै उमेरमा हुने विवाह रोक्नको लागि विवाह लाइसेन्सको व्यवस्था गर्न आवश्यक रहेको उहाँको भनाई छ ।
उहाँले विवाह गर्नको लागि पहिला नै लाइसेन्स लिनुपर्ने व्यवस्था गर्न सके कम उमेरमा विवाह गर्ने र विवाहको नाटक गरेर बेच्ने परिपाटी अन्त्य हुने उल्लेख गर्नुभयो ।
उहाँले विवाह गर्नको लागि लाइसेन्स लिन नागरिकता र अन्य तथ्यहरू आवश्यक हुने भएकाले बालविवाह रोक्न यसले मद्दत गर्ने बताउनुभयो। उहाँले यसका लागि वडा तहदेखि कानूनी रूपमा नीति बनाउन आवश्यक रहेको तर्क राख्नुभयो ।
विवाह अगाडि सबै प्रक्रिया पुर्याएर विवाह लाइसेन्स लिएर मात्रै विवाह गर्ने प्रणाली विकास गर्न आवश्यक रहेको बताउनुभयो। उहाँले धेरै देशहरूमा विवाहअगाडि विवाह लाइसेन्स लिनुपर्ने व्यवस्था रहेको उल्लेख गर्नुभयो ।
उहाँले बालविवाह, महिला हिंसा, बलात्कारजस्ता विकृतिहरू रोक्नको लागि कानून नै एक मात्र विकल्प हुनसक्ने तर्क राख्नुभयो ।
उहाँले भन्नुभयो,‘हाम्रो समाजमा विवाह दर्ता गर्ने प्रचलन छ। विवाह दर्ता गरेन भने कतिपय कुराहरू हामीले पाउँदैनौँ। विवाहको लागि लाइसेन्स लिने राम्रो हुन्छ। यो वडामा नै ल्याउन सकिन्छ। यो एउटा चलन किन सुरु नगर्ने त ?’
