काठमाडौँ । नेकपा (एमाले) संसदीय दलको बैठक आज बस्ने भएको छ । शनिबार मध्याह्न १२ बजे पार्टी कार्यालयमा सुरु हुने बैठक आइतबार पनि बस्ने छ ।
आज र भोलि दुई दिन बस्ने बैठकमा आगामी संसद्मा एमालेले खेल्ने भूमिकाबारे बृहत् रूपमा छलफल हुने सचेतक महेश बर्तौलाले जानकारी दिनुभयो ।
अबको संसद् कसरी प्रभावकारी बनाउने, सदनमा पार्टीका सांसदले कस्तो भूमिका निर्वाह गर्ने भन्नेलगायतका विविध विषयमा एमालेले छलफल गर्न लागेको हो । संसद्को हिउँदे अधिवेशन यही माघ २२ गते दिउँसो ४ बजेका लागि आह्वान भएको छ ।
यही माघ २४ गते प्रतिनिधि सभामा संसदमा प्रतिनिधित्व गर्ने सबै दलका शीर्ष नेताहरुले सम्बोधन गर्ने भएका छन् । त्यसअघि एमालेको संसदीय दलको बैठक बस्न लागेको हो ।
