काठमाडौं । निर्वाचन आयोगले आसन्न उपनिर्वाचनका लागि मतदाता नामावलीमा नाम दर्ता गर्न आह्वान गरेको छ ।
२०७९ वैशाख १० गते स्थानीय तह निर्वाचन तथा २०७९ मंसिर ४ गते प्रतिनिधि सभा र प्रदेश सभा सदस्यको निर्वाचन सम्पन्न भएपश्चात् स्थानीय तह, प्रतिनिधि सभा र प्रदेश सभा सदस्यका २३ पदहरू रिक्त भएको जानकारी प्राप्त भए बमोजिम उक्त पदहरूमा कानून बमोजिम उपनिर्वाचन मार्फत पदपूर्ति गर्नुपर्ने हुँदा मतदाता नामावलीमा नाम दर्ता गर्न आयोगले आग्रह गरेको हो ।
उल्लिखित पदमा उपनिर्वाचनद्वार पदपूर्ति गर्न आयोगले नेपाल सरकारसँग परामर्श गरी उपयुक्त समयमा कानून बमोजिम उपनिर्वाचनको मिति तोक्ने गरी आन्तरिक तयारी प्रारम्भ गरेको निर्वाचन आयोगले जनाएको छ ।
मतदाता नामावली ऐन, २०७३ को दफा ४ (१२) बमोजिम निर्वाचनको मिति तोकिएपछि सोही मितिदेखि उक्त निर्वाचन प्रयोजनका लागि मतदाता नामावलीमा नाम दर्ता गर्ने कार्य स्थगित गर्नुपर्ने कानूनी व्यवस्था रहेको आयोगले जनाएको छ।
आयोगले नियमितरूपमा प्रदेश तथा जिल्ला निर्वाचन कार्यालयहरू मार्फत मतदाता नामावली दर्ता गर्ने कार्य गर्दै आएको छ । साथै नागरिकको सहजताको लागि बाह्य जिल्लाबाट मतदाता नामावली दर्ता गर्न सकिने सुविधा समेत उपलब्ध गराएको छ ।
मतदाता दर्ता सम्बन्धी विद्यमान व्यवस्था बमोजिम देशभरका योग्यता पुगेका सबै नेपाली नागरिकहरूको मतदाता नामावलीमा नाम दर्ता भएकै छ भन्नेमा आयोग विश्वस्त रहेको आयोगका प्रपक्ता सहसचिव शालीगग्राम शर्मा पौडेलले विश्वास व्यक्त गरेका छन् ।
आगामी बैशाखमा रिक्त संघीय संसद्को १ निर्वाचन क्षेत्र, प्रदेश सभाको १, एक नगर उपप्रमुख, २ गाउँपालीका उपाध्यक्ष, एक अध्यक्ष र १५ जना वडाध्यक्षका लागि उपनिर्वाचन गर्ने तयारी आयोगको रहेको छ ।
