अर्घाखाँची । नेकपा मसालका महामन्त्री मोहन विक्रम सिंहले नेपालको राष्ट्रियता गम्भीर संकटमा परेको बताउनुभएको छ । प्रगतिशील पत्रकार संघ नेपाल अर्घाखाँचीले सन्धिखर्कमा गरेको पत्रकार सम्मेलनमा उहाँले यस्तो बताउनुभएको हो ।
राष्ट्यि स्वतन्त्र पार्टीप्रति लक्षित गर्दै उहाँले अमेरिका लगायतका शक्तिशाली देशहरुले राजनीतिक पार्टी नै खोलेर नेपालमा हस्तक्षेप गर्न आइपुगेको दाबी गर्नुभयो । विगतमा यहाँका दलका नेताहरुलाई आफ्नो अनुकुल प्रयोग गर्दै आएकोमा अहिले पार्टी नै स्थापना गरेर नेपालमा हस्तक्षेप गर्न लगाएको सिंहले बताउनुभयो ।
अमेरिकाले आफ्नो स्रोत साधनको प्रयोग गरेर आफ्नो अनुकुल काम गर्नका लागि राजनीतिक दलमा लगानी गरेको उहाँको दावी छ । ‘अहिले अमेरिकाको मुख्य प्रतिस्पर्धा चीनसंग छ, त्यसले गर्दा पनि उसले चीनलाई साईजमा राख्न नेपालको भूमि प्रयोग गर्न खोजिरहेको छ ।,‘यहाँको अस्थीरतामा खेलेर नयाँ दलमार्फत त्यो स्वार्थ पूरा गर्ने तयारीमा रहेको देखिन्छ ।’
‘देश अहिले गम्भीर संकटमा छ, गणतन्त्र धर्म निरपेक्षता लगायतका उपलब्धिहरु जोखिममा परेका छन ।’ उहाँले भन्नुभयो ‘प्रतिगमनकारीहरु अराजकता फैल्याएर प्राप्त उपलब्धिहरुलाई समाप्त पार्ने दाउमा छन्, त्यो सफल हुने सम्भावना छैन तर दलहरु सचेत हुनुपर्छ ।’
वर्तमान अवस्थामा गठबन्धन भत्कने कुनै सम्भावना समेत नभएको बताउँदै उहाँले पाँच दलीय गठबन्धनले पाँच वर्ष सरकार चलाउने बताउनुभयो । साथै सिंहले विभिन्न घटनामा दोषी भ्रष्टचारीलाई कारबाही गर्न सरकारले खुट्टा कमाउन नहुनेमा जोड दिनुभयो ।
